अझै पनि कोरोना परीक्षणबिनै भित्रँदैछन् नेपाली
<p>कैलाली। भारतका विभिन्न शहरबाट नेपालीहरू स्वदेश भित्रने क्रम जारी छ।</p>
<p>आज मात्रै कैलालीको गौरीफन्टा नाका भएर दुई हजारभन्दा बढी नेपाली नेपाल प्रवेश गरेको जिल्ला प्रशासन कार्यालय कैलालीका सूचना अधिकारी शिवराज जोशीले बताए।</p>
<p>उनले अहिले पनि उद्धारको कार्य जारी रहेको बताउँदै उनीहरूलाई सम्बन्धित पालिकामा पठाउने तयारीसमेत भइरहेको बताएका छन्।</p>
<p>आज पनि परीक्षणबिना नै उनीहरूलाई भित्र्याउन थालिएको हो। प्रदेश सरकारले र्‍यापिड किटको अभाव भएको बताउँदै आएको छ।</p>
<p>सीमामा पुगेका नेपालीहरूलाई आज पनि कैलाली उद्योग वाणिज्य संघका अध्यक्ष पुष्पराज कुँवरले पानी, चाउचाउलगायतका ड्राइफुडहरू वितरण गरेका थिए।</p>
<p>त्यस्तै नेपाल विद्यार्थी संघ क्षेत्र ५ कैलालीले भन्सारनजिकै रहेको नवदुर्गा माविमा रहेको क्वारेन्टाइनमा बसेकाहरूलाई भोजनको व्यवस्था गरिएको नेपाल विद्यार्थी संघ क्षेत्र ५ कैलालीका सभापति गजेन्द्र शाहीले बताए ।</p>
<p>उनले आज करीब एक हजारजनालाई भोजनको व्यवस्था गरिएको बताउँदै भोलिदेखि नियमितरूपमा भोजनको व्यवस्था गरिने बताए।</p>
<p>यसअघि ७ जेठमा गौरीफन्टा नाकाबाट ८५८ र हिजाे, ८ जेठमा दुई हजार ४९८ मजदुरलाई स्थानीय प्रशासनको समन्वयमा उद्धार गरिएको थियो।</p>
<p>७ जेठमा कसैको पनि काेभिड-१९ परीक्षण गरिएकाे थिएन। हिजाे ६०० जनाको मात्रै र्‍यापिड टेस्ट गरिएको सूचना अधिकारी जोशीले बताए।</p>
प्रतिक्रिया दिनुहोस्
.jpg)
