धनकुटाका स्वास्थ्यकर्मी- आफैं कोरोना संक्रमित छन् तर आइसोलेसनमा सबैको आड बनिरहेछन्
<p>काठमाडौं। विश्व्व्यापी महामारी कोभिड-१९ विरूद्धको संघर्षमा पहिलो पंक्तिमा छन्, स्वास्थ्यकर्मी। कोरोना संक्रमितको उपचार गर्दागर्दै उनीहरू आफैँ पनि संक्रमित हुने गरेका छन्।</p>
<p>नेपालमा पनि चिकित्सक र केही स्वास्थ्यकर्मी कोरोना भाइरसबाट संक्रमित भएका छन्। त्यसरी संक्रमित हुनेमध्ये सबैभन्दा बढी धनकुटा जिल्ला अस्पतालका स्वास्थ्यकर्मी छन्। त्यहाँ कार्यरत दुईजना स्टाफ नर्स र दुईजना हेल्थ असिष्‍टेन्ट (एच.ए.) गरी चारजना स्वास्थ्यकर्मी संक्रमित भएका हुन्।</p>
<p>विराटनगरस्थित कोशी अस्पतालको कोरोना विशेष उपचार केन्द्रमा भर्ना गरिएका उनीहरू न त अताल्लिएका छन्, न त आफ्नो दायित्व नै बिर्सिएका छन्। बरू उनीहरू त अस्पतालको आइसोलेसनमा भएका आफूजस्ता संक्रमितलाई परामर्श, स्याहार र उपचार कार्यमा सहयोग गरिरहेका छन्।</p>
<blockquote>
<p><strong>"उहाँहरू डराइरहनुभएको थियो। उहाँहरू र हामी सबैजना उस्तैउस्तै (कोभिड-१९ पोजिटिभ) भएकोले हामीलाई अलि बढी विश्‍वास गर्नुहुन्छ। समयमा खाना खान, स्वास्थ्य सुरक्षाका सावधानी अपनाउन भन्दै निको हुनेमा विश्‍वस्त पार्दैछौं"- संक्रमित ३४ वर्षीया नर्स शिला सुब्बाले भनिन्।</strong></p>
</blockquote>
<p>कोशी अस्पतालका डा. दीपक सिग्देल भर्ना भएका स्वास्थ्यकर्मीहरूले अस्पतालको वार्डमा सँगै रहेका अन्य संक्रमितहरूको हौसला बढाइरहेको बताउँछन्।</p>
<p>"आफ्नो समस्याको कुनै वास्ता नै नगरी उहाँहरूले हाम्रो कामलाई पनि सहज बनाइदिनुभएको छ" सिग्देलले देखापढीसँग भने, "एकजना सिष्‍टर त हामी आफैं नै आईभी (सुईबाट नसामा दिइने औषधि) लगाइदिन्छौ तपाईंहरू आउनुपर्दैन भन्‍नुहुन्छ। यो त एकदमै 'ग्रेट थिङ्गस' भयो नी होइन।"</p>
<p>अस्पतालमा भर्ना भएका चारैजना स्वास्थ्यकर्मी लगायतको अवस्था सामान्य रहेको उनले जानकारी दिए।</p>
<p>अस्पतालको आइसोलेसनमा उपचाररत धनकुटा अस्पतालमा कार्यरत ३४ वर्षीया स्टाफ नर्स शिला सुब्बाले उपचारका लागि भर्ना भएकाहरूलाई आफूहरूको उदाहरण दिएर मनोबल बढाउने काम गरिरहेको बताएकी छन्। देखापढीसँग टेलिफोनमा उनले भनिन्, "हामीले यहाँ भर्ना हुनुभएकाहरूलाई आत्मबल दर्‍हो पार्नुपर्छ हामी सबैजना निको भएर छिट्टै घर फर्कन सक्छौं भनेर सम्झाइरहेका छौं। उहाँहरू पनि उत्साहित हुनुहुन्छ।"</p>
<p>"यहाँ हामीसँगै भर्ना हुनुभएका इटहरीका एकजनालाई चाहिँ निमोनिया देखिएको छ। अरु सबैजना ठिकै हुनुहुन्छ", सुब्बा भन्छिन्, "उहाँहरूको स्वास्थ्य अवस्था सोध्‍ने, 'मेडिकेसन' मा सपोर्ट गरिरहेका छौं। पेशाले पनि हाम्रो काम नै त्यही हो। आफ्नो कर्तव्य त जहाँ जस्तो अवस्था रहँदा पनि भुल्नुभएन नी।" </p>
<p>"उहाँहरू डराइरहनुभएको थियो। उहाँहरू र हामी सबैजना उस्तैउस्तै (कोभिड-१९ पोजिटिभ) भएकोले हामीलाई अलि बढी विश्‍वास गर्नुहुन्छ। समयमा खाना खान, स्वास्थ्य सुरक्षाका सावधानी अपनाउन भन्दै निको हुनेमा विश्‍वस्त पार्दैछौं", उनले दिनचर्या सुनाइन्।</p>
<p>धनकुटा अस्पतालको बहिरङ्ग विभागकी इन्चार्ज रहेकी नर्स सुब्बालाई ४ जेठमा कोरोना भाइरस संक्रमण पुष्‍टि भएको थियो। उनको 'कन्ट्याक्ट ट्रेसिङ' को आधारमा गरिएको परीक्षणको क्रममा थप ६ जनामा कोरोना संक्रमण पुष्टि भएको थियो। तीमध्ये दुई एचए र थप एकजना स्टाफ नर्समा कोभिड-१९ पोजिटिभ देखिएको छ। उनीहरू सबैजना छिट्टै निको भएर काममा फर्कनेमा विश्‍वस्त छन्।</p>
<p>आफू अनि परिवारको पीडा र स्वार्थलाई भुलेर जस्तोसुकै अवस्थामा पनि नागरिकको स्वास्थ्य सुरक्षामा खटिएका स्वास्थ्यकर्मी आफैं कोभिड-१९ संक्रमणको शिकार बन्दाबन्दै गरिरहेको यो उदाहरणीय कार्यले आशाको नयाँ किरण छरेको छ।</p>
प्रतिक्रिया दिनुहोस्
.jpg)
