दशरथ रंगशालालाई क्वारेन्टाइन नबनाउन एन्फाको आग्रह
<p>काठमाडौं। अखिल नेपाल फुटबल संघ (एन्फा) ले दशरथ रंगशालालाई क्वारेन्टाइन नबनाउन सरकारसँग आग्रह गरेको छ। </p>
<p>शहीद स्मारक ‘ए’ डिभिजन लिग-२०७६ को ‘टेक्निकल ह्याण्डबुक’ विमोचन कार्यक्रममा एन्फाका अध्यक्ष कर्माछिरिङ शेर्पाले मैदानका घाँस जोगाउन रंगशालालाई क्वारेन्टाइन नबनाइदिन अनुरोध गरेका हुन्।</p>
<p>‘‘रंगशालामा छिर्दाछिदै नराम्रो खबर सुन्नु पर्‍यो। हामी साँच्चिकै अन्तर्राष्ट्रिय स्तरको पिच बनाउने भनेर काम गरिरहेका छौं। त्यसका लागि यो लकडाउनको बेलामा पनि हामीले मैदान मर्मतको काम गरिरहेका छौं,’’ अध्यक्ष शेर्पाले भने, ‘‘यहाँ क्वारेन्टाइन राख्यौं भने यो घाँस एक हप्तामै बिग्रिन्छ। हामीले फेरि शून्यबाट शुरू गर्नुपर्ने हुन्छ। त्यसकारण क्वरेन्टाइन नराख्नका लागि अनुरोध गर्दछौं। यसको विकल्पमा अन्य स्थान खोज्‍न एन्फाले सहयोग गर्नेछ।’’</p>
<p>एन्फाले फिफा विश्वकप २०२२ तथा एशियन कप २०२३ को छनोट प्रतियोगिताको घरेलु खेल आयोजना गर्नका लागि अहिले मैदानको मर्मत गरिरहेको छ। गत मंसीरदेखि शहीद स्मारक ‘ए’ डिभिजन लिग सकिने वित्तिकै मर्मत कार्य शुरू भएको हो।</p>
<p>दशरथ रंगशाला विश्वकप छनोट चरणअन्तर्गत् अस्ट्रेलिया, चाइनिज ताइपेई र जोर्डनलाई आतिथ्य गर्ने तयारीमा जुटेको थियो, नेपाल।</p>
<p>तर, कोभिड-१९ महामारीका कारण छनोट खेल स्थगित भएको हो। नेपालले फिफा विश्वकप २०२२ एसियाली छनोटको दोस्रो चरणमा १३ चैतमा चाइनिज ताइपेई र त्यसको पाँच दिन पछाडि १८ चैतमा अस्ट्रेलियाविरुद्ध होम गेम खेल्दै थियो।</p>
<p>त्यस्तै २२ जेठमा जोर्डनलाई आतिथ्य प्रदान गर्ने तालिका थियो। त्यसैको तयारीका लागि अखिल नेपाल फुटबल संघ (एन्फा) ले शहीद स्मारक ‘ए’ डिभिजन लिग सकिएलगत्तै मैदानमा मर्मत थालेको थियो। ग्राउण्ड इन्चार्ज दिलिप रजकको नेतृत्वमा अहिले पनि मर्मत कार्य जारी छ।</p>
<p>फुटबलबाहेक अन्य कार्यक्रम पनि रंगशालामा आयोजना हुने भएका कारण ठुला प्रतियोगितामा मैदानको घाँस कुरूप देखिदै आएको छ।<br />
<br />
राष्ट्रिय खेलकुद परिषदले यसअघि सरकारलाई आफू मातहत रहेका भौतिक संरचनामा क्वारेन्टाइन तथा सेल्फ आइसोलेसन कक्ष स्थापना गर्न दिने बताएको थियो।</p>
<p>त्यस्तै एन्फाले पनि आफु मातहत रहेका भैतिक संरचनालाई प्रयोग गर्न दिने बताउँदै आएको छ। अहिले कतिपय स्थानमा क्वारेन्टाइन राखिएको छ।</p>
प्रतिक्रिया दिनुहोस्
.jpg)
