कोरोना संक्रमणबाट मृत्यु भएका गुल्मीका युवकको दोस्रो रिपोर्ट पनि पोजिटिभ
<p>काठमाडौं। कोरोना संक्रमणबाट मृत्यु भएका गुल्मीको मदाने गाउँपालिका-६ का ४१ वर्षीय युवकको दोस्रो परीक्षण रिपाेर्ट पनि पोजिटिभ देखिएको छ।</p>
<p>हिजो, ८ जेठ बिहान अस्पतालमा मृत्यु भइसकेपछि दोस्रोपटक नमूना परीक्षण गर्न पठाइएको थियो।</p>
<p>प्रदेश ५ को सामाजिक विकास मन्त्रालयअन्तर्गत स्वास्थ्य सेवा महाशाखाका प्रमुख डा. उमाशंकर चौधरीले दोस्रो परीक्षण रिपोर्ट पनि पोजिटिभ आएको पुष्टि गरे।</p>
<p>गुल्मीका ती युवक १ जेठमा उच्च ज्वरो, रुघाखोकीलगायतका समस्या देखिएपछि उपचारका लागि रूपन्देहीको मणिग्रामस्थित क्रिमसन अस्पतालमा भर्ना भएका थिए।</p>
<p>उनको ५ जेठमा कोरोना भाइरस (कोभिड-१९) को पहिलो परीक्षण रिपोर्ट पोजिटिभ पुष्टि भएको थियो।</p>
<p>अस्पतालको आईसीयूमा उपचाररत बिरामीमा कोरोना संक्रमण पुष्टि भएपछि क्रिमसन अस्पताल सिल गरिएको थियो।</p>
<p>आईसीयूमा बिरामी हेर्ने चिकित्सक, स्वास्थ्यकर्मी, इमरजेन्सी फाँटका कर्मचारी र बिरामीका कुरुवाको नमूना संकलन गरेर परीक्षणका लागि पठाइएको थियो।</p>
<p>महाशाखा प्रमुख चौधरीका अनुसार २९ जनाको स्वाब नमूना संकलन गरिएकाे थियाे। तीमध्ये अहिलेसम्म आएकाे १९ वटा नमूना परीक्षणको रिपाेर्ट नेगेटिभ रहेको उनकाे भनाइ छ।</p>
प्रतिक्रिया दिनुहोस्
.jpg)
