कोरोनाबाट मृत्यु भएकी महिलाको नवजात शिशु डिस्चार्ज
<p>काठमाडौं । कारोना संक्रमणबाट मृत्यु भएकी सिन्धुपाल्चोककी महिलाको नवजात शिशुसहित आफन्त अस्पतालबाट डिस्चार्ज भएका छन्।</p>
<p>धुलिखेल अस्पतालले पीसीआर विधिबाट कोरोना परीक्षण गर्दा रिपोर्ट नेगेटिभ आएपछि डिस्चार्ज गरिएको अस्पतालका प्रवक्ता डा. सुमन ताम्राकारले जानकारी दिए। कोरोना संक्रमणबाट सुत्केरीको मृत्यु भएपछि उनका नवजात शिशु र आफन्तलाई आइसोलेसनमा राखेर उपचार गरिएको थियो। </p>
<p>दुईपटक पीसीआर जाँच गर्दा पनि रिपोर्ट नेगेटिभ आएपछि आइसोलेसनबाट डिस्चार्ज गरिएको डा. ताम्राकारले बताए। उनीहरूको सबै रिपोर्ट नेगेटिभ आएको छ। अहिले डिस्चार्जका लागि कागजी प्रक्रिया भइरहेको डा. ताम्राकारले बताए ।</p>
<p>शुरुमा शिशुमा हल्का जन्डिस देखिएको थियो। आज पुनः जाँच गराउँदा उनको अवस्था ठीक भइसकेको छ । अस्पतालले डिस्चार्जका लागि बाल रोग विशेषज्ञको राय लिएको थियो। विशेषज्ञले डिस्चार्ज गर्न योग्य भएको निष्कर्ष दिएपछि प्रक्रिया अगाडि बढाइएको उनको भनाइ छ। </p>
<p>अस्पतालबाट डिस्चार्ज भएपछि पनि उनीहरू सात दिन क्‍वारेन्टाइनमा बस्‍नुपर्नेछ । सात दिनपछि आरडीटी परीक्षण गरेर घर पठाइनेगरी व्यवस्था मिलाइएको धुलिखेल अस्पतालका कोभिड-१९ उपचारका लागि समन्वयकर्तासमेत रहेका डा. ताम्राकारले बताए। </p>
<p>२४ वैशाखमा शिक्षण अस्पताल महाराजगञ्‍जमा छोरालाई जन्म दिएर डिस्चार्ज भई घर गएकी सुत्केरीको स्वास्थ्यमा समस्या भएपछि उपचार क्रममा धुलिखेल अस्पतालमा १ जेठमा मृत्यु भएको थियो।</p>
प्रतिक्रिया दिनुहोस्
.jpg)
