बन्द होटेल र रिसोर्ट अब कोरोना क्वारेन्टाइन
<p>काठमाडौं। विदेशबाट फर्किएका नागरिकलाई राख्‍न हाल बन्द अवस्थामा रहेका होटेल र रिसोर्टलाई क्‍वारेन्टाइन बनाइने भएको छ।</p>
<p>शहरी विकास मन्त्रालयमा हिजो भएको छलफलमा राज्यमन्त्री रामवीर मानन्धरले देशभर व्यवस्थित रूपमा चलेका होटल र रिसोर्टलाई क्‍वारेन्टाइन बनाउनेबारे परामर्श थालिएको बताए।</p>
<p>उनका अनुसार हाल काठमाडौं उपत्यकामा पाँच सय १८ वटा आइसोलेसन शय्या उपलब्ध छन्। यस्तै, देशभरका ६५ हजार क्‍वारेन्टाइनमा करिब २५ हजार जना बसिरहेका छन्।</p>
<p>मुलुक संकटमा रहेका बेला ठूला होटेललाई क्‍वारेन्टाइनका रूपमा व्यवस्थापन गर्न सरकारले पहल गरिरहेको र तिनका सञ्चालकले सहयोग गर्ने विश्वास राज्यमन्त्री मानन्धर व्यक्त गरे।</p>
<p>त्यसका लागि सरकारले होटेलहरूलाई निश्चित रकम पनि उपलब्ध गराउने उनले बताए।</p>
<p>विदेशमा रहेकामध्ये खाडी मुलुकमा रोजगारीमा गएका युवा सरकारको प्राथमिकतामा रहेको उनले जानकारी दिए। क्‍वारेन्टाइनको सम्पूर्ण खर्च संघीय सरकारले बेहोर्ने बताउँदै उनले निर्धक्क भएर व्यवस्थापनमा लाग्न स्थानीय सरकारहरूलाई आग्रह गरे। <em><strong>रासस</strong></em></p>
प्रतिक्रिया दिनुहोस्
.jpg)
