.jpg)
कोरोना संक्रमितको उपचार गर्न कास्कीमा नौ शय्याको आईसीयू तयार हुँदै
<p>कास्की। कोभिड–१९ का बिरामीको उपचार गर्न पोखरा स्वास्थ्य विज्ञान प्रतिष्ठान अन्तर्गतको पश्चिमाञ्चल क्षेत्रीय अस्पतालमा नौ शय्याको सघन उपचार कक्ष (आईसीयू) तयार गरिने भएको छ। सो अस्पताललाई ‘डेडिकेटेड अस्पताल’ तोकिएको छ ।</p>
<p>पछिल्ला दिन कोरोनाको जोखिम बढेसँगै अस्पतालमा सम्भावित गम्भीर अवस्थाका बिरामीको उपचारलाई लक्षित गरी विशेष सुविधासहितको कोभिड-१९ उपचारमैत्री शय्याको निर्माण थालिएको हो।</p>
<p>अस्पतालका निर्देशक सहप्राध्यापक डा. अर्जुन आचार्यले गम्भीर अवस्थाका बिरामीको उपचारका लागि तीन/चार दिनभित्रमा सुविधासम्पन्न आईसीयू तयार भइसक्ने जानकारी दिए।</p>
<p>अहिलेको ११ शय्याको क्षमताबाट घटाएर सहज उपचारका लागि नौ शय्यामा सीमित गर्न लागिएको छ। अस्पतालले २० लाख लागतमा विशेष खालको उपचार कक्ष निर्माण गरिरहेको जनाएको छ ।</p>
<p>त्यसैगरी हालको मेडिकल वार्डमा समेत २५ शय्या तयार गर्न लागिएको छ। आवश्यकतानुसार सो कक्षमा शय्या विस्तार गर्न सकिने आचार्यले बताए।</p>
<p>“तत्काल कोरोनाका बिरामीलाई आइसोलेसनमा राखेर उपचार गर्ने व्यवस्था मिलाइएको छ । गम्भीर अवस्थाका बिरामीका लागि केही दिनमा नै आईसीयू र मेडिकल वार्डमा उपचारको प्रबन्ध गरिने छ, अहिले त्यसको काम भइरहेको छ”, उहाँले भन्नुभयो ।</p>
<p>कोरोनाका बिरामीको उपचारका लागि प्रदेशअन्तर्गतका ११ वटै जिल्लामा गरी २८३ आइसोलेशन शय्या तयारी अवस्थामा राखिएको प्रदेश स्वास्थ्य निर्देशनालयका निर्देशक डा. विनोदविन्दु शर्माले बताए।</p>
<p>जिल्लामा पुष्टि भएका बिरामीको उपचार सम्बन्धित जिल्लामा गर्ने गरी चिकित्सक तथा स्वास्थ्यकर्मीलाई तालिम, अस्पतालमा उपकरण तथा स्वास्थ्य सामग्री व्यवस्थापनको काम भइरहेको उनले जानकारी दिए। <em>रासस</em></p>
प्रतिक्रिया दिनुहोस्
.jpg)
