अलपत्र परेका नेपाली र भारतीयको उद्धारको लागि दार्चुलामा पुल खोलियो
<p>दार्चुला। भारतसँगको सीमा जोडिएको दार्चुलाको महाकाली नदीको पुल केही बेर खोलेर नेपाली र भारतीयलाई आवतजावत गराइएको छ।</p>
<p>बिहान ९ बजेतिर खोलिएको पुलबाट सीमापारि रहेका नेपालीलाई भित्र्याउने र दार्चुलामा रहेका भारतीयलाई उनीहरूको देश फर्काइएको दार्चुलाका सहायक प्रमुख जिल्ला अधिकारी टेकसिंह कुँवरले जानकारी दिए। </p>
<p>व्यास गाउँपालिका-१ का सौका समुदाय भारतीय बाटो हुँदै तीन–चार दिन हिँडेर घर फर्कनुपर्ने हुन्छ। ६ महीना दार्चुला झर्ने र ६ महीना आफ्नो थातथलो फर्कने गरेका उनीहरू लकडाउनका कारण फर्कन पाएका थिएनन्।</p>
<p><img alt="" height="720" src="https://www.dekhapadhi.com/storage/photos/shares/COVID-19/darchula pul 1.jpg" width="960" /></p>
<p>चैत अन्तिमदेखि वैशाख पहिलो सातासम्म व्यास पुगिसक्ने उनीहरू यस वर्ष लकडाउनका कारण बेंसीमै रोकिएका थिए।</p>
<p>व्यासी सौकालाई बसाइँ सर्न र नेपाल-भारतमा रोकिएका नागरिकलाई आ–आफ्नो देश फर्काउन दुवै देशका स्थानीय प्रशासनको समन्वयमा केही बेरका लागि पुल खोलिएको कुँवरको भनाई छ।</p>
<p>नेपालमा अलपत्र ३० जना भारतीयलाई आफ्नो देश पठाइएको छ। भारतीय बजार क्षेत्र धार्चुलामा रोकिएका नेपालीहरूलाई पनि स्वदेश फर्काइएको छ।</p>
<p>नेपाल ल्याइएकाहरूको विवरण संकलन गर्ने काम भइरहेको भन्दै केही दिन क्वारेन्टाइनमा राखेर आ आफ्नो क्षेत्रमा पठाइनेछ।</p>
प्रतिक्रिया दिनुहोस्
.jpg)
