स्पेनका स्ट्राइकर अडुरिजको संन्यास
<p>काठमाडौं । एथलेटिक विल्वाओका स्ट्राइकर अरिट्ज अडुरिजले बुधबार फुटबलबाट संन्यासको घोषणा गरेका छन्। ‘हिप’को शल्यक्रिया गर्नुपर्ने र खेल्न बाधा हुने भएका कारण संन्यास घोषणा गरेको उनले जनाएका छन्।</p>
<p>३९ वर्षे अडुरिज ट्विटमा लेखेका छन्, ‘‘शरीरले अब पुग्यो भन्यो र अब करिअर टुंग्याउनुपर्ने समय भएको छ।’’</p>
<p>उनलाई चिकित्सकले चाँडोभन्दा चाँडो शल्यक्रिया गर्न सल्लाह दिएका छन्। ‘प्रोस्थेटिक हिप’को शल्यक्रियापछि उनी सामान्य अवस्थामा फर्किने चिकित्सकले जनाएका छन्। तथापि खेल्न भने बाधा पुग्‍नेछ।</p>
<p>‘‘म अब टीमका साथीहरूलाई चाहेजस्तो सहयोग सक्दिनँ, ’’ अडुरिजले भने।</p>
<p>अडुरिजले स्पेनका अन्य क्लब भालाडोलिड, मालोर्का, भ्यालेन्सियाबाट पनि खेलेका थिए। उनले क्लब फुटबलमा एक सय ७२ गोल गरिसकेका छन्। स्पेनले सन् २०१६ मा फ्रान्समा सम्पन्‍न युरोपियन च्याम्पियनसिपको उपाधि जित्दा टीम सदस्य थिए। दुई दशकको फुटबल करिअर टुंग्याउन लागेका हुन्। </p>
<p>एथलेटिक विल्वाओ अप्रिलमा रियल सोसिडाडविरुद्ध कोपा डेल रे फाइनल खेल्ने तयारीमा थियो। तर कोभिड-१९ महामारीका कारण खेल स्थगित भएको थियो। समाचार एजेन्सी एपीका अनुसार अडुरिज पनि त्यो फाइनल खेल्न चाहन्थे। तर, स्वास्थ्यले उनलाई साथ दिएन।</p>
<p>‘‘दुर्भाग्य, हामी यस्तो पीडादायी परिस्थितिबाट गुज्रिरहेका छौं। हामीले भोगिरहेको महामारीले हामीलाई अपुरणीय क्षति पुर्‍याएको छ र हामीले यसविरुद्ध लड्नुपर्नेछ,’’ अडुरिजले भने, ‘‘त्यसकारण मैले मेरोबारेमा चिन्ता गरेको छैन। हामीले सपना देखेको फाइनल बिर्सौं। किनकि अब विदा माग्‍नुपर्ने समय आएको छ।’’</p>
<p>सन् २०१५ को स्पेनिस सुपर कप फाइनलमा एथलेटिक विल्बाओले बार्सिलोनालाई ५-१ ले हराउँदा अडुरिजले दुई लेगमा ४ गोल गरेका थिए। उनले पछिल्लो गोल लिगमा एथलेटिक विल्बाओले बार्सिलोनालाई १-० ले हराउँदा ८९औं मिनटमा गरेका थिए।</p>
प्रतिक्रिया दिनुहोस्
.jpg)
