कोभिड-१९ फैलिरहेका भारतसहितका चार देश, जहाँ बढ्दै छन् बिरामी
<p>जेनेभा। पछिल्लो २४ घण्टामा देखिएका कोभिड-१९ का नयाँ बिरामीमध्ये दुई तिहाइ हिस्सा चारवटा देशमा रहेको विश्‍व स्वास्थ्य संगठनले जानकारी दिएको छ।</p>
<p>ती चार मुलुक हुन्- अमेरिका, रुस, ब्राजिल र भारत। पछिल्लो २४ घण्टामा विश्‍वभर एक लाख ६ हजार नयाँ बिरामी फेला परेका छन्। यो संख्या एकै दिनमा कोरोना भाइरस संक्रमित भेटिएको सबैभन्दा ठूलो रहेको संगठनको भनाइ छ।</p>
<p>हिजो मात्र संगठनका महानिर्देशक टेड्रोस अदानम गेब्रियससले कोरोना भाइरस संक्रमणसँग लामै यात्रा हुन सक्ने बताएका थिए। उनको भनाइ लकडाउन खोल्न हतारिएका मुलुकहरूतिर लक्षित थियो।</p>
<p>दक्षिण अमेरिकी मुलुक ब्राजिल अहिले कोभिड-१९ महामारीको केन्द्रका रूपमा देखिएको छ। ब्राजिलमा कोभिड-१९ का बिरामी बेलायतमा भन्दा बढी भइसकेका छन् र निरन्तर बढ्दो क्रममा छन्।</p>
<p>दक्षिण एशियामा भारतमा भाइरस संक्रमण लगातार बढ्दो छ। पछिल्लो २४ घण्टामा भारतमा पाँच हजार ६ सय नौ नयाँ बिरामी भेटिएका छन्।</p>
प्रतिक्रिया दिनुहोस्
.jpg)
