लकडाउनको सन्नाटामा सम्पदा स्याहार्दैछ भक्तपुर
<p>भक्तपुर। सडक छ सुनसान। चोक सुनसान। गल्लीहरू सुनसान। सत्तल, पाटी र मन्दिर पनि सुनसान।</p>
<p>लकडाउनले सिर्जना गरेको यो सन्‍नाटाको सदुपयोग गरिरहेछ भक्तपुर नगरपालिकाले। नगरवासीलाई आफ्नो टोल वा नगरभित्रका काममा संलग्न गराउँदै भक्तपुर नगरपालिकाले सम्पदा पुनर्निर्माण गरिरहेछ। <br />
२०७२ सालको विनाशकारी महाभूकम्पले भक्तपुर नगरपालिकामा रहेको ङातापोल (पाँचतले) मन्दिर भत्केको त थिएन, तर क्षतिग्रस्त भने भएको थियो। मानव सिर्जनाको उदाहरण बनिबसेको त्यो पाँचतले मन्दिरको अहिले स्थानीय उपभोक्ता समितिमार्फत् जीर्णोद्धार भइरहेको छ।</p>
<p>जीर्णोद्धारमा सहभागी छन् स्थानीय कालिगढ। र, विभिन्‍न दिनमा टोलका महिलाहरूले जीर्णोद्धार कार्यक्रममा श्रमदान गरिरहेका छन्। ३ जेठमा वडा नम्बर ५ का महिलाहरूले श्रमदान गरेका थिए भने ४ जेठमा वडा नम्बर ८ का जेंला र लान्तलेका महिलाले। </p>
<p>जनश्रमदान मात्रै नभई ङातापोल मन्दिर जीर्णोद्धारका लागि नगरवासीले आफूखुशी आर्थिक सहयोग पनि गरिहेका छन्। २३ वैशाखमा नगरपालिकाले सूचना जारी गरेर इच्छुक संघसंस्था, व्यक्ति, दाफा, गुठीहरूलाई नेपाल बैंक लिमिटेडको खातामा रकम दाखिला गरी आर्थिक सहयोग गर्न आह्वान गरेको थियो। उक्त खातामा २८ वैशाखसम्म १ लाख ८२ हजार ४७९ रूपैयाँ जम्मा भइसकेको छ। </p>
<p>भक्तपुर नगरपालिका-५ का वडाध्यक्ष प्रेमगोपाल कर्माचार्यका अनुसार ६५ लाखको लागतमा जीर्णोद्धार हुन लागेको ङातापोल मन्दिरको गजुर राख्‍ने र एक तल्लामा झिंगटी हाल्ने काम भइसकेको छ। नगरवासीको श्रमदान र सहयोगले यो काम चाँडो भइरहेको प्रेमगोपालले बताए। </p>
<p>जीर्णोद्धारसँगै उपभोक्ता समितिले काम गर्ने कालिगढको सुरक्षाको पनि बन्दोबस्त मिलाएको छ। कोभिड-१९ को संक्रमण फैलिन नदिन र काम गर्दा हुने दुर्घटनाबाट बच्‍न बचाउनका लागि मास्क, हेल्मेट दिइएको छ भने त्यहाँ काम गर्ने मुख्य कालिगढहरूको जीवन बीमासमेत गरिएको प्रेमगोपालले बताए। </p>
<p>ङातापोल मात्रै नभई भक्तपुर नगरपालिकाका अन्य थुप्रै स्थानमा सम्पदाहरू पुनर्निर्माण वा जीर्णोद्धारको काम भइरहेको छ। भक्तपुरको छिपा ताः (हनुमानघाट पुल) ढलान गर्ने, भक्तपुर नगरपालिका वडा नम्बर ९, सूर्यमढीस्थित टुलुहिटी (ढुंगेधारा) निकास खोल्ने काम भएको छ। ऐतिहासिक मंगलतीर्थ शिवालय परिसरको पर्खाल शिलान्यास भएको छ। त्यस्तै भक्तपुर नगरपालिकाद्वारा सञ्‍चालित जनस्वास्थ्य सेवा केन्द्र अगाडि निर्मित फार्मेसी ब्लकको ढलान कार्य पनि सम्पन्‍न भएको छ। </p>
<p>यस्तै २०७२ को भूकम्पले पूर्ण क्षतिग्रस्त सोही वडाको च्यामासिंह ध्वाका (ढोका) पुनर्निर्माण कार्य अन्तिम चरणमा पुगेको छ। भक्तपुर नगरपालिकाको ३९ लाख रुपैयाँ बजेटमा बनेको ध्वाकामा स्थानीय कालिगढ र वडाका स्वयंसेवकले ५ जेठमा झिंगटी हालेका थिए। त्यस्तै भक्तपुर नगरपालिकाको बजेटमा ६ जेठदेखि वडा नम्बर ९ कै सूर्यमढीमा नित्यनाथ नास द्योः (देउता) मन्दिर पुनर्निर्माण शुरु भएको छ।</p>
<p>सम्पदा स्याहार्ने सबै जिम्मा नगरपालिकाले स्थानीयवासीलाई नै दिएको छ। स्थानीयवासीलाई नै सम्पदा पुनर्निर्माण र जीर्णोद्धारको काम सुम्पिँदा सम्पदाप्रति अपनत्वको भावना बढ्ने संस्कृतिविद् ओम धौभडेल बताउँछन्। </p>
<p>“आफूले मिहिनेत गरेको ठाउँको माया आफैंलाई लाग्छ,” धौभडेल भन्छन्, “आफू नै त्यहाँ संलग्‍न भएपछि त्यहाँ काम कसरी भइरहेको छ भनेर स्थानीयवासी सचेत हुन्छन्। केही गडबडी हुन थाल्यो भने रोक्छन्। सम्पदा कसैले बिगार्न खोजे रोक्छन्। यसले सम्पदालाई लामो समय बचाउन मद्दत गर्छ।” </p>
<p>जीर्णोद्धारको आवश्यकता भएका मन्दिरको चाँडै मर्मत नगरे वर्षायाममा झन् खराब हुने भएकाले काममा तीव्रता दिइएको संस्कृतिविद् धौभडेल बताउँछन्। भन्छन्, “अहिले लकडाउनका कारण डिस्टर्ब गर्ने मानिस पनि छैनन्। मानिसले आनन्दसँग काम गर्न पाएका छन्।” उनका अनुसार भक्तपुरमा ९० प्रतिशत सम्पदा पुनर्निर्माणको काम सम्पन्‍न भइसकेको छ।</p>
प्रतिक्रिया दिनुहोस्
.jpg)
