लकडाउनको अप्रत्यक्ष असर : बढ्दै छन् मानसिक बिरामी
<p>लन्डन। कोरोना भाइरसको प्रसार रोक्न लागू गरिएको लकडाउनको अप्रत्यक्ष प्रभावका रूपमा संसारभर मानसिक बिरामीको लहर आउने चेतावनी चिकित्सकहरूले दिएका छन्।</p>
<p>लकडाउनको समयमा अपनाइएको सेल्फ आइसोलेसनका कारण बालबालिका र ज्येष्‍‍ठ नागरिकको उचित स्याहार हुन नसकेको उनीहरूको भनाइ छ। </p>
<p>पछिल्लो समय अस्पतालमा मानसिक स्वास्थ्यसम्बन्धी आपतकालीन बिरामी बढ्दो क्रममा रहेको मनोचिकित्सकहरूले गरेको एक सर्वेक्षणले देखाएको छ। र, नियमित जाँच गराउन आउनेको संख्यामा भने कमी आएको छ।</p>
<p>लकडाउनको दौरान मानसिक स्वास्थ्य सुविधाहरू उपलब्ध रहेको तर सुविधा लिन मानिसहरू नआएको सर्वेक्षणबाट देखिएको छ। नियमित जाँच र फलोअपका लागि पनि बिरामीहरू नआएको देखिएको छ।</p>
<p>बेलायतको रोयल कलेज अफ साइकियाट्रिस्टका प्रमुख प्राध्यापक वेन्डी बर्नको भनाइमा कोभिड-१९ को महामारीले मानसिक स्वास्थ्यमा गम्भीर असर पुर्‍याएको छ। र, धेरै मानिसलाई तत्काल सहायताको आवश्यकता छ।</p>
<p>“तर, जस-जसलाई तत्काल मद्दतको आवश्यकता छ, लकडाउनका कारण उनीहरूसम्म पहुँच पुर्‍याउन सहज छैन,” उनी भन्छन्, “हामीलाई डर छ, कतै यसले मानसिक बिरामीको ठूलो लहर त सिर्जना गर्दैन !”</p>
<p>बीबीसीका अनुसार बेलायतमा एक हजार तीन सय चिकित्सकबीच गरिएको सर्वेमा ४३ प्रतिशतले मानसिक समस्याका बिरामीको संख्या ह्वात्तै बढेको बताएका छन्। यस्तै, ४५ प्रतिशतले नियमित जाँचमा आउनुपर्ने बिरामी नआएको बताएका छन्। </p>
<p>“यस्तो लाग्छ, हाम्रा ज्येष्‍‍ठ नागरिक बिरामी विलकुल गायब नै भएका छन्,” एक मनोचिकित्सकले सर्वेमा संलग्‍न टीमसँग भने, “शायद उनीहरू सहायता लिन साह्रै डराएका छन्।”</p>
<p>अर्का एक चिकित्सकले लेखेका छन्, “सामाजिक रूपमा अलग बन्‍नु, बढ्दो तनाव र औषधिहरू सकिनुजस्ता कोरोना भाइरस संक्रमणले उत्पन्‍न समस्याका कारण अन्य व्यक्तिमा पनि मानसिक बिमारीका लक्षण देखिन थालेका छन्।”</p>
<p>रोयल कलेज अफ साइकियाट्रिस्टका बाल तथा किशोर मनोचिकित्सा विभाग प्रमुख डा. बर्नार्ड ड्युबिका भन्छन्, “मानसिक समस्याबाट जुझिरहेका बालबालिका र किशोर-किशोरीलाई आवश्यक सहायता नमिलिरहेको विषयमा हामी चिन्तित छौं। मानसिक स्वास्थ्य सुविधा लकडाउनमा पनि उपलब्ध रहेको सन्देश पुर्‍याउनु अत्यावश्यक छ।”</p>
<p>ओल्ड-एज साइकियाट्री विशेषज्ञ डा. एमेन्डा थम्पसेलको भनाइमा ज्येष्‍‍ठ नागरिकलाई प्रविधिको प्रयोगमार्फत चिकित्सकसँग कुराकानी गर्न पनि समस्या छ। “जबकि, उनीहरूका लागि यो अत्यावश्यक छ,” उनी भन्छिन्।</p>
<p>मानसिक स्वास्थ्यको क्षेत्रमा कार्यरत संस्था ‘रिथिंक मेन्टल इलनेस’का ड्यानियल ह्यामको भनाइमा एकदमै जटिल अवस्थामा काम गरिरहेका अस्पतालहरूले मानसिक स्वास्थ्यलाई पनि प्राथमिकता दिनुपर्छ। हालै संस्थाले गरेको सर्वेक्षणमा सहभागीहरूले मानसिक स्वास्थ्यलाई फाइदाजनक थुप्रै चिज अहिले बन्द रहेकामा चिन्ता व्यक्त गरेका थिए।</p>
प्रतिक्रिया दिनुहोस्
.jpg)
