के बदलिँदैछ कोरोना भाइरस ?
<p>बेइजिङ। चीनको पूर्वोत्तर क्षेत्रमा कोभिड-१९ का बिरामीमा वुहान शहरका बिरामीमा भन्दा अलग लक्षण देखिएको छ। र, उनीहरूलाई वुहानका बिरामीलाई भन्दा बढी समय उपचार गर्नुपरिरहेको छ।</p>
<p>चीनको नेशनल हेल्थ कमिसनको शीर्ष मेडिकल टीमका सदस्य तथा प्रतिष्‍ठित चिकित्सक किउ हाइबोका अनुसार हेइलङजियाङ र जिलिन प्रान्तका बिरामीमा सामान्यभन्दा अलग लक्षण देखिएको छ। र, अन्य प्रान्तका बिरामीलाई भन्दा बढी समय अस्पतालमा राख्नु परिरहेको छ।</p>
<p>दुवै प्रान्तका नयाँ बिरामीमा ज्वरो थिएन। तर, थकान अनुभूति गर्थे र खोकीको समस्या थियो। केही बिरामीमा त कुनै लक्षण थिएन।</p>
<p>“यसबीचमा जति पनि नयाँ रोगी आए, उनीहरूमा भाइरस बढी समयसम्म जीवित रह्यो,” डा. किउले सीसीटीभी-१३ सँग भने।</p>
<p>चिनियाँ सरकारी अखबार ग्लोबल टाइम्सको एक रिपोर्टअनुसार वुहानका बिरामीको जाँच रिपोर्ट लक्षण देखिएको बढीमा दुई सातामा नेगेटिभ आउने गर्थ्यो।</p>
<p>पछिल्लो समयमा बिरामी संख्या त घट्दो क्रममा छ। तर, नयाँ बिरामीमा लामो समय भाइरसको प्रभाव देखिने गरेको छ।</p>
<p>चिनियाँ सरकारी समाचार एजेन्सी सिन्हवाका अनुसार जिलिन प्रान्तमा २५ जना नयाँ बिरामी उपचाररत छन्। हेइलङजियाङ प्रान्तमा भने हालसम्मका सबै बिरामी उपचारपछि घर फिरेका छन्।</p>
प्रतिक्रिया दिनुहोस्
.jpg)
