सुदूर पहाडमा बढ्दैछन् गिद्ध
<p>कैलाली। गिद्धलाई प्रकृतिको कुचीकारका रूपमा लिइन्छ। संरक्षण अभावमा यो संकटग्रस्त अवस्थामा छ।</p>
<p>तर, सूदुरका पहाडी जिल्लामा भने गिद्धको संख्या बढ्दै गएको पाइएको छ।</p>
<p>केही वर्षअघिसम्म बिरलै देखा पर्ने गिद्ध अहिले प्रशस्त मात्रामा देखिन थालेका छन्।</p>
<p>डिभिजन भेटेरीनरी कार्यालय डोटीका अनुसार जिल्लामा गिद्धको संख्या कति छ भनेर यकिन तथ्यांक छैन।</p>
<p>सामुद्रिक सतहबाट ३०० देखि ६०० मिटर उचाइमा गिद्ध देखिन थालेको सुदूरपश्चिम क्षेत्रीय कृषि निर्देशनालय दिपायल राजपुरका क्षेत्रीय निर्देशक यज्ञराज जोशीले बताए।</p>
<p>पछिल्लो समय देशका अधिकांश जिल्ला डाइक्लोफेनेकमुक्त घोषणा भइसकेपछि गिद्धको संख्यामा विस्तारै वृद्धि हुँदै गइरहेको जोशीको भनाइ छ।</p>
<p style="text-align:center"><img alt="" height="488" src="https://www.dekhapadhi.com/storage/photos/shares/Wildlife/vulture 2.jpg" width="650" /></p>
<p>“डाइक्लोफेनेक खुवाइएका चौपाया मरेपछि सो सिनो खाँदा गिद्धको मिर्गौलामा समस्या भई मर्ने गर्छन्”, उनले भने। </p>
<p>मध्य पहाडी भागमा वासस्थान हुने सुन गिद्ध, घाँटी खुलेका र अन्य सानो प्रजातिका हिमाली गिद्ध पछिल्ला वर्षमा बढ्दै गएको खप्तड राष्ट्रिय निकुञ्जका पूर्व सहायक संरक्षण अधिकृत प्रकाश शाह बताउँछन्।</p>
<p>खासगरी खप्तड राष्ट्रिय निकुञ्जलगायत अन्य उच्च लेकाली क्षेत्रभित्र हिमाली गिद्धको संख्यामा वृद्धि भएको उनकाे भनाइ छ।</p>
<p>उनका अनुसार पर्याप्त आहारा, वासस्थान संरक्षण तथा पशुमा डाइक्लोफेनेक नामक औषधिको प्रयोग नगरिनुलगायत कारणले यहाँ गिद्धको संख्यामा वृद्धि भएको हो।</p>
<p style="text-align:center"><img alt="" height="488" src="https://www.dekhapadhi.com/storage/photos/shares/Wildlife/vulture.jpg" width="650" /></p>
<p>उनले यसअघि गिद्धको बारेमा यहाँ कुनै अध्ययन अनुसन्धान नभएको बताए। “पछिल्ला वर्षमा गिद्धको संख्या धेरै देखिन थालेको छ”, उनले भने, “निकुञ्ज तथा सम्बन्धित कार्यालयले अध्ययनका लागि योजना बनाउन आवश्यक छ।”</p>
<p>नेपालमा हाडफोर, सेतो, डंगर, सानोखैरो, हिमाली, खैरो, राज, सुन र लामोठुँडे गिद्ध गरी ९ प्रजातिका गिद्ध पाइन्छन्।</p>
<p>डंगरगिद्ध, सानोखैरो गिद्ध, सुनगिद्ध र लामो ठुँडेगिद्ध अतिसंकटापन्न सूचीमा छन्। सेतो गिद्ध र हिमाली गिद्ध पनि संकटापन्नउन्मुख रहेको शाह बताउँछन्।</p>
प्रतिक्रिया दिनुहोस्
.jpg)
