प्रदेश १ मा सातजना कोरोना संक्रमित थपिए, नेपालमा संक्रमित संख्या ४३४ पुग्यो
<p>काठमाडौं। प्रदेश १ मा सातजना कोरोना भाइरस संक्रमित थपिएका छन्। </p>
<p>आज साँझको अद्यावधिक विवरण अनुसार झापामा ५, धनकुटा र धरानमा एक/एक जनालाई कोभिड-१९ पुष्टि भएको प्रदेश १ को मुख्यमन्त्री कार्यालयले जनाएको छ। </p>
<p>योसँगै नेपालमा संक्रमितको संख्या ४३४ पुगेको छ। </p>
<p>झापाका ५ जना प्रदेश प्रयोगशालामा गरिएको परीक्षणमा तथा धनकुटाका पुरुष र धरानकी महिलाको धरानस्थित बीपी कोइराला स्वास्थ्य विज्ञान प्रतिष्ठानको प्रयोगशालामा गरिएको परीक्षणमा कोभिड-१९ पुष्टि भएको हो।</p>
<p>झापाका संक्रमितहरू यसअघि १० जना संक्रमित भेटिएको भारतसँग सीमा जोडिएको केचनाकवल गाउँपालिकाका हुन्। उनीहरू भारतबाट केही दिनअघि फर्किएकाहरू रहेको बताइएको छ।</p>
<p>धनकुटाका संक्रमित यसअघि धनकुटामा पुष्‍टि भएका ६ जना बिरामीको सम्पर्कमा रहेमध्येका एक हुन्।</p>
<p>धरानकी महिला भने धरान उपमहानगरपालिका-१३ शिवधाराकी ५२ वर्षीया महिला हुन्।</p>
<p>प्रदेश १ मा परीक्षणको दायरा बढेसँगै संक्रमितको संख्या पनि दिनहुँ थपिन थालेको छ। अहिलेसम्म ६६ जनामा कोरोना संक्रमण पाइएको छ।</p>
<p>यस प्रदेशमा सबैभन्दा धेरै उदयपुरमा ३३ जना संक्रमित फेला परेका छन्। त्यस्तै झापामा १७, धनकुटामा ७, मोरङमा ४, सुनसरीमा ३, खोटाङमा एक र भोजपुरमा एक संक्रमण पुष्टि भएको हो।</p>
<p>२६ जना उपचारपछि निको भएर घर फर्किएको प्रदेशस्तरीय कोभिड-१९ अनुगमन तथा प्रतिवेन सचिवालय प्रमुख ज्ञानबहादुर बस्‍नेतले बताए। कोशी अस्पतालबाट आज पाँच भारतीय र उदयपुर त्रियुगा नगरपालिकाका तीन गरी ८ जनालाई डिस्चार्ज गरिएको छ।</p>
<p>प्रदेश १ मा निको हुनेहरूको संख्या २६ रहेको छ। अहिलेसम्म पीसीआरबाट तीन हजार ७०० र आरडीटीबाट ९ हजार ८३७ जनाको परीक्षण भएको बताइएको छ। </p>
प्रतिक्रिया दिनुहोस्
.jpg)
