कालिमाटी वृत्तका २१४ प्रहरीलाई क्वारेन्टाइनमा राखियो, सबैको पीसीआर परीक्षण गरिने
<p>काठमाडौं। दुईजना प्रहरी कर्मचारीमा कोरोना भाइरस संक्रमण फेला परेपछि महानगरीय प्रहरी वृत्त कालिमाटीका सबै प्रहरी क्वारेन्टाइनमा बसेका छन्।</p>
<p>महानगरीय प्रहरी परिसर काठमाडौंका प्रमुख एसएसपी श्याम ज्ञवालीका अनुसार त्यहाँ कार्यरत् सबै २१४ जनालाई नै अहिले क्वारेन्टाइनमा राखिएको छ।</p>
<p>ड्युटीमा खटिएका एक जना प्रहरी नायव निरीक्षक र एक जवानमा कोभिड-१९ पुष्‍टि भएपछि सम्भावित संक्रमणको जोखिमलाई ध्यान दिँदै वृत्त नै 'सिल' गरिएको छ।</p>
<p>संक्रमित दुवै प्रहरीलाई बलम्बुस्थित सशस्त्र प्रहरी कोरोना विशेष अस्पतालमा भर्ना गरिएको छ।</p>
<p>"कार्यालयको गेट नै बन्द गरेर सबै प्रहरीलाई क्वारेन्टाइनमा राखेका छौं। त्यस क्षेत्रको सुरक्षामा अन्यत्र युनिटबाट प्रहरी टोली परिचालन गरिएको छ", एसएसपी ज्ञवालीले भने।</p>
<p>पीसीआर विधिबाट सबैजनाको कोरोना परीक्षण गरिने भन्दै त्यसका लागि स्वास्थ्यको संयन्त्रले काम थालिसकेको उनले जानकारी दिए।</p>
प्रतिक्रिया दिनुहोस्
.jpg)
