स्वदेश फर्किन पाउनुपर्ने माग गर्दै नेपाली नागरिकले थाले भारतीय भूमिमा धर्ना (भिडिओसहित)
<p>कैलाली। भारतको सीमावर्ती बजार पलियामा रोकिएका नेपाली नागरिकले स्वदेश फर्किन पाउनुपर्ने माग गर्दै सडकमै धर्ना शुरु गरेका छन्। </p>
<p>पलिया बजारका व्यापारी तथा भारतीय जनता पार्टी (भाजपा)का नेता रवि गुप्ताका अनुसार धर्नामा दुई हजारभन्दा बढी नेपाली नागरिक सहभागी छन्। उनीहरूले कैलालीको गौरीफन्टा नाकाबाट स्वदेश फर्किन पाउनुपर्ने माग अगाडि सारेका छन्।</p>
<p>गुप्ताका अनुसार आज बिहान मात्र करिब एक हजार पाँच सय नेपाली भारतका विभिन्न शहरबाट बस, ट्रक र जिप चढेर पलिया आइपुगेका छन्। “उनीहरूको व्यवस्थापन निकै चुनौतीपूर्ण भएको छ,” गुप्ताले देखापढीसँग फोनमा भने, “भारतीय प्रशासनले नेपालको प्रशासनसँग उनीहरूको व्यवस्थापनका लागि समन्वय गरिरहेको छ।”</p>
<p>कैलालीका प्रमुख जिल्ला अधिकारी यज्ञराज बोहराले भारतबाट आएका नेपालीलाई स्वदेश भित्र्याउन कुनै समस्या नरहेको बताए। उनीहरूको उद्धारपछि सम्बन्धित पालिकासम्म पुर्‍याउन प्रशासन एक्लैले नसक्ने भएकाले प्रदेश र स्थानीय सरकारको समन्वयको खाँचो रहेको उनको भनाइ छ।</p>
<p>सीमामा र्‍यापिड टेस्ट गराएर उनीहरूलाई सम्बन्धित पालिकासम्म पुर्‍याउने जिम्मा स्थानीय र प्रदेश सरकारले लिए मात्रै भारतमा अलपत्र नेपालीको उद्धार गर्न सकिने उनले बताए। उद्धारमा भन्दा पनि नेपाल ल्याइसकेपछि गन्तव्यमा पठाउन समस्या रहेको प्रजिअ बोहराले बताए।</p>
<p>गत शुक्रबार र शनिबार नेपाल भित्र्याइएकाहरूलाई गन्तव्यसम्म पुर्‍याउन निकै समस्या भएको उनले बताए। स्थानीय व्यापारीहरूको सहयोगमा उनीहरूलाई सम्बन्धित पालिकासम्म पुर्‍याइएको उनले जानकारी दिए। “सधैँ कति व्यापारीसँग हात थापिरहनु,” उनले भने, “प्रदेश र स्थानीय सरकारले पनि आफ्ना नागरिकबारे चासो दिनु पर्‍यो।”</p>
<p><strong>हेर्नूहोस् भिडिओ</strong></p>
<p><iframe frameborder="0" height="515" scrolling="no" src="https://www.youtube.com/embed/ru7h9Ewjt5M" width="760"></iframe></p>
प्रतिक्रिया दिनुहोस्
.jpg)
