कालिमाटी वृत्तका दुईजना प्रहरीमा कोरोना संक्रमण, वृत्त सिल गरेर कार्यरत प्रहरीको नमूना परीक्षण गरिँदै
<p>काठमाडौं। महानगरीय प्रहरी वृत्त कालिमाटीमा कार्यरत दुईजना प्रहरी कर्मचारीमा कोरोना भाइरस संक्रमण देखिएको छ।</p>
<p>महानगरीय प्रहरी परिसर काठमाडौंका प्रमुख एसएसपी श्याम ज्ञवालीले दुईजना ड्युटीमा खटिएका प्रहरीमा कोरोना संक्रमण पुष्टि भएको जानकारी दिए।</p>
<p>संक्रमित हुनेमा एकजना प्रहरी नायव निरीक्षक र एकजना सिपाही रहेका छन्। लकडाउन कार्यान्वयन गराउन उनीहरु नियमित जसो फिल्डमा खटिने गरेका थिए।</p>
<p>उनीहरु दुवैजनामा कोरोना संक्रमण देखिएपछि प्रहरीले अहिले वृत्त सिल गरेको छ। प्रहरी कर्मचारीहरुलाई हिडडुल गर्न रोकिएको परिसर प्रमुख ज्ञवालीले जानकारी दिए।</p>
<p>“वृत्तका दुईजना कर्मचारीहरुमा संक्रमण देखिएपछि अहिले सिल गरिसकेका छौं”, उनले भने-“त्यहाँ कार्यरत अन्य प्रहरी सबैको नमूना परीक्षण गरेर उनीहरुलाई क्वारेन्टाइनमा पठाइने छ।”</p>
<p>यसअघि जिल्ला प्रहरी कार्यालय बारामा कार्यरत प्रहरी जवानलाई संक्रमण देखिएको थियो। त्यस्तै सशस्त्र प्रहरीका दुईजना कर्मचारीमासमेत संक्रमण देखि सकेको छ।</p>
<p>नेपाली सेनाको महोत्तरीको बर्दिवासस्थित मध्यपूर्वी पृतनाका प्रमुख पृतनापति र सेनाकै एमबीबीएस डाक्टरमा पनि संक्रमण भइसकेको छ।</p>
<p>संक्रमित भएका सुरक्षाकर्मीहरुको विभिन्न अस्पतालमा उपचार भइरहेको छ।</p>
प्रतिक्रिया दिनुहोस्
.jpg)
