भारतबाट ट्रक चढेर आएका थिए झापा कचनकवलका १० जना कोरोना संक्रमित
<p>काठमाडौं। झापाको कचनकवलमा कोरोना भाइरसको संक्रमित भेटिएका १० जना भारतबाट ट्रक चढेर आएको खुलेको छ।</p>
<p>रोजगारीमा भारत गएका उनीहरू भारतको विभिन्‍न शहरबाट एक साताअघि ट्रक चढेर नेपाल प्रवेश गरेको कचनकवल गाउँपालिकाका अध्यक्ष अन्‍जरा आलमले <em>देखापढी</em>लाई बताए।</p>
<p>भारतसँग सिमाना जोडिएको दक्षिणी झापामा पर्ने यो गाउँपालिका आजबाट 'सिल' गरिएको छ।</p>
<p>कोभिड-१९ का १० जना बिरामी भेटिएपछि पुरै गाउँपालिकामा आवतजावत बन्द गरिएको आलमले जानकारी दिए।</p>
<p>"हिजोसम्म पाँच वटा वडा 'सिल' गरेका थियौं तर जोखिम झन धेरै देखियो अहिले सात वटै वडामा कडाइ गरेका हौं", उनले भने।</p>
<p>गाउँपालिकाको १ देखि ५ सम्म पाँच वटा वार्ड भारतसँग जोडिएको छ।</p>
<p>कचनकवलमा ५ र ६ जेठमा १० जना संक्रमित भेटिएका हुन्। उनीहरू सबै भारतबाट आएर क्वारेन्टाइनमा बसेकाहरू हुन्।</p>
<p>भारतबाट फर्किएकाहरू एक सयभन्दा बढी क्‍वारेन्टाइनमा रहेको उनले बताए। उनका अनुसार बस्तीमा भने बिरामी नदेखिएकोले थप संक्रमण फैलिन नदिन सावधानी अपनाइएको छ।</p>
<p>अब भारतबाट अब फर्कनेहरूका लागि केचनाको महेन्द्ररत्न माविमा १०० बेडको थप क्वारेन्टाइन निर्माणको काम शुरू गरिएको छ।</p>
प्रतिक्रिया दिनुहोस्
.jpg)
