क्रिष्टियानो रोनाल्डो भन्छन्- धैर्य गरौं, समस्या पार लगाउने उपाय भेटिनेछ
<p>काठमाडौं। इटालियन सिरी ‘ए’ क्लब युभेन्टसका फरवार्ड क्रिष्‍टियानो रोनाल्डोले धैर्य र निरन्तरता भयो भने समस्याहरू पार लगाउने उपाय भेट्न सकिने बताएका छन्। </p>
<p>मंगलबार क्लबको प्रशिक्षणमा फर्किएका रोनाल्डोले ट्विटरमा अभ्यास गरेको तस्वीरसहित लेखेका छन्, ‘‘जब हामी धैर्य र निरन्तरता हुन्छ, हामीले समस्याहरू पार गर्ने उपाय भेट्छौं।’’</p>
<p>उनले ह्यासट्यागमा खेलेका छन्, ‘‘पुरानो बाटोमा फर्किएका छौं। जिम्मेवार हौं।’’</p>
<p>रोनाल्डोले १० साताको छुट्टिपछि क्लबमा फर्किएका हुन्। लकडाउनको समय जन्मथलो पोर्चुगलमा रहेका पाँचपटकको बालोन डी‘अर विजेता रोनाल्डो टुरिनस्थित घरमा दुई साता आइसोलेसनमा बसेका थिए। उनी इटालियन सिरी ‘ए’ मा इन्टर मिलानलाई २-० ले पराजित गरेको खेलपछि टिमसँग छैनन्। ८ मार्चको उक्त खेलपछि उनी पोर्चुगलको माडेइरास्थित आफ्नो घर गएका थिए।</p>
<p>सरकारले लकडाउनको घोषणा गरेपछि ९ मार्चदेखि इटालियन सिरी ‘ए’ स्थगित भएको थियो। सिरी ‘ए’ १३ जुनदेखि शुरू गर्ने तयारी गरिएको थियो। तर, इटली सरकारले १४ जुनसम्म सबै खेलकुद गतिविधिमा रोक लगाएको छ।</p>
<p>लकडाउनअघि रोनाल्डो उच्च लयमा थिए। उनले २२ सिरी ‘ए’ खेलमा २१ गोल गरिसकेका छन्। लिग स्थगन हुनुअघि लगातार ११ खेलमा गोल गरेका रोनाल्डो एक हजार अफिसियल खेल खेल्ने खेलाडी बनेका थिए।</p>
<p>इटलीमा दोस्रो सिजन बताइरहेका रोनाल्डो लगातार दोस्रो पटक सिरी ‘ए’ उपाधि जित्‍ने लक्ष्‍यमा छन्। युभेन्टस दोस्रो स्थानको लाजियोभन्दा एक अंकले माथि छ।</p>
प्रतिक्रिया दिनुहोस्
.jpg)
