प्रिमियर लिगका ६ खेलाडीमा कोरोना भाइरस पोजिटिभ
<p>काठमाडौं। वाटफोर्डका एक खेलाडी, दुई कर्मचारी र बर्नलिका सहायक प्रशिक्षक इयान बोएनसहित प्रिमियर लिगमा ६ जनामा कोभिड-१९ पोजिटिभ देखिएको छ। </p>
<p>प्रियिमर लिगले तेस्रो क्लबको अन्य दुईजनाको बारेमा विस्तृत विवरण सार्वजनिक गरेको छैन। परीक्षणमा पोजिटिभ नतिजा आएका खेलाडी तथा कर्मचारी सात दिन सेल्फ आइसोलेसनमा बस्‍नुपर्नेछ। </p>
<p>प्रिमियर लिगका क्लबले मंगलबार सामाजिक दूरीसहित सानो समूहमा प्रशिक्षण शुरू गर्न गरिएको परीक्षणमा यस्तो नतिजा आएको हो। कोभिड-१९ महामारीका कारण स्थगित प्रिमियर लिग पुनः शुरू गर्ने योजनामा छ। </p>
<p>१९ क्लबका खेलाडी र कर्मचारी गरी सात सय ४८ जनाको परीक्षण भएको छ। नर्विच सिटीको परीक्षण हुन बाँकी छ। </p>
<p>वाटफोर्डले एक खेलाडी र दुई कर्मचारीको परिक्षण पोजिटिभ आएको पुष्‍टि गरेको छ। तर, क्लबले नाम सार्वजनिक गरेको छैन। वाटफोर्डका खेलाडी तथा कर्मचारीको परीक्षण पोजिटिभ आएको समाचार आउनुअघि क्लबका कप्तान ट्रोए डिनेले परिवारको स्वास्थ्य सुरक्षाको डरका कारण आफू तालिममा उपस्थित हुन नसक्ने बताएका थिए। </p>
<p>‘‘मैले उपस्थित हुन नसक्ने बताइसकेको छु। समूहमा एक जनालाई पोजिटिभ भयो भने म घर फर्किन सक्दिनँ,’’ कप्तान डिनेले भनेका छन्, ‘‘मेरो छोरा पाँच महीनाको छ। उसलाई सास फेर्नमा गाह्रो भइरहेको छ। म उसलाई अझै जोखिममा पार्न चाहन्‍नँ।’’</p>
<p>बर्नलीले सहायक प्रशिक्षक बोएनलाई कुनै लक्षण नदेखिएको र सुरक्षित रूपमा घरमा बसिरहेको जनाएको छ। </p>
<p>महामारीका कारण प्रिमियर लिग १३ मार्चदेखि स्थगित भएको थियो। लिगमा अझै ९२ खेल बाँकी छन्। १२ जुनबाट प्रिमियर लिग पुनः शुरू गर्ने योजनामा छ। क्लबहरूले मंगलबारदेखि सानो समूह (पाँचजना भन्दा धेरै हुन नहुने) र उनीहरूको एक सेसन बढीमा ७५ मिनटको हुने गरी प्रशिक्षण शुरू गरेका छन्।</p>
प्रतिक्रिया दिनुहोस्
.jpg)
