मुख्यमन्त्रीका स्वकीय सचिवकाे अडिओ भाइरल, सीमावर्ती बजारसम्म आउने नेपाली झन् बढे
<p>कैलाली। भारत हरियाणास्थित पानीपतबाट नेपाली बोकेको गाडी उत्तर प्रदेश कन्नौजमा आज दुर्घटना भयो। दुर्घटनामा १२ जनाभन्दा बढी नेपाली घाइते भए।</p>
<p>आगरा एक्सप्रेस मार्गमा भएको गाडी दुर्घटनामा पानीपतबाट धनगढी आउँदै गरेका नेपालीहरू परेको बताइएको छ।</p>
<p>स्वदेश फर्कने आशामा गाडी बुक गरेर नेपालीहरू आइरहेका थिए। घाइतेहरूलाई स्थानीय प्रहरीले अस्पताल पुर्‍याएको छ।</p>
<p>लामो समयको लकडाउनले भारतका विभिन्न स्थानमा अलपत्र परेका नेपालीहरू अहिले नेपालको सीमासम्म आउने क्रम बढेको छ।</p>
<p>अहिलेसम्म करीब दुई हजार नेपाली कैलालीसँग सीमा जोडिएको सीमावर्ती भारतीय बजार पलिया आइपुगेका छन्।</p>
<p>सुदूरपश्चिमका मुख्यमन्त्री त्रिलोचन भट्टका स्वकीय सचिव प्रेम कुँवरको एउटा अडिओ भाइरल भएपछि नेपालीहरू सीमावर्ती बजारसम्म आउने क्रम बढेको हो।</p>
<p>सरकारले नाका खुला गरिसकेको भन्दै प्रवासमा रहेका नेपालीहरूलाई आउन आह्वान गरेको अडिओ अहिले भाइरल भइरहेको छ।</p>
<p>जसकारण भारतमा रहेका हजारौँ नेपालीहरू स्वदेश फर्कने आशामा गाडी बुक गरेर सीमावर्ती बजारसम्म आइपुगेका छन्।</p>
<p>भाइरल अडिओका विषयमा बुझ्न खाेज्दा मुख्यमन्त्रीका स्वकीय सचिव कुँवर भने सम्पर्कमा आउन चाहेनन्।</p>
<p>भारतको मुम्बई, दिल्ली, बेंग्लोर, गुजरात, राजस्थानलगायतका स्थानबाट झण्डै दुई हजार नेपाली पलिया आइपुगेको पलियाका व्यापारी तथा भाजपाका नेता रवि गुप्ताले बताए।</p>
<p>पलियामा निर्माण गरिएको क्वारेन्टाइनमा ४५० व्यक्तिलाई मात्र राख्न सक्ने क्षमता भएकाले अन्यलाई राख्न निकै समस्या भएको उनको भनाइ छ।</p>
<p>उनका अनुुसार पलियामा रहेका म्यारिज हल, गोदाम घरलगायतका स्थानमा नेपालीहरूलाई राखिएको छ।</p>
<p>हिजो पलिया आइपुगेका डडेल्धुराका भवानी साउँदले सबै नेपालीहरूलाई एकै ठाउँमा राख्दा संक्रमणको जोखिम बढेको बताए।</p>
प्रतिक्रिया दिनुहोस्
.jpg)
