धादिङको जुँगेखोला क्षेत्र ११ जेठसम्मका लागि ‘सिल’
<p>धादिङ। थाक्रे गाउँपालिका-८ स्थित जुँगेखोला क्षेत्रमा बसोबास गर्ने एक व्यक्तिमा कोरोना संक्रमण देखिएपछि उक्त क्षेत्र ‘सिल’ गरिएको छ।</p>
<p>आजदेखि ११ जेठसम्म पाँच दिनका लागि सो क्षेत्र सिल गरिएको प्रमुख जिल्ला अधिकारी असमान तामाङले बताए। </p>
<p>पूर्वमा धार्केखोला पुल, पश्चिममा आठकिला मोड, उत्तरमा महेश खोला र दक्षिणमा उडुवादेवी आधारभूत विद्यालयबीचको क्षेत्रलाई सिल गर्ने निर्णय भएको उनले बताए।</p>
<p>प्रमुख जिल्ला अधिकारीको अध्यक्षतामा थाक्रे गाउँपालिकामा आज बसेको जिल्ला सुरक्षा समिति र स्थानीय जनप्रतिनिधिको बैठकले गाउँबाट कोही मानिस बाहिर जान नपाइने तथा भित्र आउन नपाइने गरी सिल गरेकाे हाे।</p>
<p>बैठकले स‌ंक्रामक रोग ऐन, २०२० को दफा २ र स्थानीय प्रशासन ऐन, २०२८ को दफा ६ उपदफा २ बमोजिम ११ जेठ राति १२ बजेसम्मका लागि निषेधाज्ञा जारी गर्ने निर्णय गरेको छ।</p>
<p>चार किल्ला क्षेत्रभित्र पूर्ण सिलबन्दी गर्ने, पूर्णरूपमा आवतजावत बन्द गर्ने, नेपाल प्रहरी र सशस्त्र प्रहरी बल नेपालले सुरक्षा व्यवस्था मिलाउने र आवश्यकताअनुसार नेपाली सेनाले भेइकल पट्रोल गर्नेलगायत निर्णय गरेको गाउँपालिका अध्यक्ष रामकुमार आचार्यले जानकारी दिए।</p>
<p>कोरोना संक्रमित काठमाडौंको बागबजारमा व्यवसाय गरेर बस्ने गरेका थिए। उनी ११ चैतमा थाक्रेस्थित गाउँ आएर २८ मा काठमाडौं नै फर्किएका थिए।</p>
<p>गाउँको स्थानीय व्यक्तिलाई कोरोनाको संक्रमण देखिएपछि अहिले थाक्रे-८, को जुँगेखोला क्षेत्रलाई जिल्ला सुरक्षा समितिले सिल गरेको छ।</p>
<p>संक्रमित व्यक्ति लामो समयसम्म गाउँमा बसेर काठमाडौं गएकाले उनको सम्पर्कमा रहेका व्यक्तिलाई खोजतलास गर्नका लागि वडाध्यक्ष, स्वास्थ्यकर्मी र सुरक्षाकर्मीको टोली बनाइएको छ।</p>
<p>‘कन्ट्र्याक ट्रेसिङ’ गरिएपछि सबैको कोरोना परीक्षण गरिने योजना छ। <em>रासस</em></p>
प्रतिक्रिया दिनुहोस्
.jpg)
