गुल्मीका कोरोना संक्रमितको भैरहवाकै अस्पतालमा उपचार गरिने
<p>काठमाडौं। रूपन्देहीको क्रिमसन अस्पतालमा उपचाररत गुल्मीका कोरोना संक्रमित व्यक्तिको सोही अस्पतालमा उपचार हुने भएको छ। </p>
<p>अस्पतालको आईसीयूमा उपचाररत ती बिरामीलाई तत्काल अन्यत्र नलगी त्यहीं उपचार गराउन लागिएको जिल्ला स्वास्थ्य कार्यालय रूपन्देहीका भेक्टर कन्ट्रोल निरीक्षक केदारनाथ शाहले जानकारी दिए।</p>
<p>“हिजो संक्रमण पुष्‍टि भएपछि बुटवलको कोरोना अस्पतालमा लग्‍ने की त्यहीं राख्‍ने भन्‍ने छलफल भएको थियो,” उनले भने, “आईसीयूमै राखेर उपचार भइरहेकाले तत्काललाई त्यहीं राख्‍न लागिएको हो।”</p>
<p>यसैबीच, उनको सम्पर्कमा आएका २५ जनाको आज थ्रोट स्वाबको नमूना संकलन गरेर पीसीआर विधिबाट परीक्षण गरिँदैछ। </p>
<p>“उनको उपचारमा रहेका आईसीयुका चिकित्सक र स्टाफ, राउण्ड लिने चिकित्सक, नर्स, इमर्जेन्सीका स्टाफ र तीनजना कुरुवाको आज नमूना संकलन गरेर परीक्षण हुन्छ,” शाहले भने, “नमूना संकलनका लागि चिकित्सकसहितका स्वास्थ्यकर्मी खटिसकेका छन्।”</p>
<p>उनीहरूको परीक्षण रिपोर्ट आएपछि मात्रै थप मानिसको परीक्षण गर्ने की नगर्ने भन्‍ने निर्णय हुने उनले जानकारी दिए।</p>
<p>उच्च ज्वरो, रुघाखोकीलगायत समस्या देखिएपछि १ जेठमा उनी अस्पताल भर्ना भएका थिए। क्रिमसन अस्पताल हिजो साँझदेखि नै सिल गरिएको छ। </p>
<p>गुल्मी मदाने गाउँपालिका-६ पुर्कोटदहका ४१ वर्षका पुरुषमा हिजो भैरहवास्थित प्रादेशिक जनस्वास्थ्य प्रयोगशालामा गरिएको परीक्षणमा कोरोना संक्रमण पुष्‍टि भएको थियो।</p>
प्रतिक्रिया दिनुहोस्
.jpg)
