डब्लूएचओ चीनको पपेटः ट्रम्प
<p>वासिङ्टन। अमेरिकी राष्‍ट्रपति डोनाल्ड ट्रम्पले विश्‍व स्वास्थ्य संगठन (डब्लूएचओ)लाई चीनको खेलौना (पपेट) भएको आरोप लगाएका छन्।</p>
<p>बीबीसीका अनुसार विश्‍वव्यापी महामारीविरुद्ध जुझ्‍ने रणनीति तयार गर्न डब्लूएचओले आयोजना गरेको दुईदिने भर्चुअल कन्फरेन्स सकिएलगत्तै ट्रम्पको यो टिप्पणी आएको हो।</p>
<p>“हामीलाई डब्लूएचओले धेरै खराब सल्लाह दियो, भयानक खराब सल्लाह,” ट्रम्पले पछिल्लो नियमित प्रेस ब्रिफिङमा भने, “एकदमै खराब र चीनको पक्षमा रहेर सल्लाह दियो।”</p>
<p>धेरै मानिसको जीवनसँग खेलबाड गरेर डब्लूएचओले कोभिड-१९ को महामारीलाई लापरवाहीपूर्ण ढंगले ‘ह्यान्डल’ गरेको उनको आरोप थियो।</p>
<p>चीनतिर ढल्केर डब्लूएचओले विश्‍वलाई यस महामारीबारे पर्याप्त पूर्वजानकारी नदिएको ट्रम्पले आरोप लगाउँदै आएका छन्। यति ठूलो महामारीलाई चीनले पनि शुरुमा ढाकछोप गरेको आरोप उनले लगाउने गरेका छन्।</p>
<p>डब्लूएचओको कन्फरेन्समा ट्रम्प उपस्थित भएनन्, अमेरिकी स्वास्थ्यमन्त्रीलाई सहभागी गराए। कन्फरेन्सलाई सम्बोधन गरेका चिनियाँ राष्‍ट्रपति सी चिनफिङले कोभिड-१९ को महामारी खुला र पारदर्शी रहेको बताए। महामारी नियन्त्रणमा आएपछि मात्र यसबारे अध्ययन-अनुसन्धान हुन सक्ने उनको भनाइ थियो।</p>
प्रतिक्रिया दिनुहोस्
.jpg)
