भेटिएनन नेपालका लागि बेलायतका पूर्वराजदूत, खोजीका लागि प्रहरीको अर्को अपील
<p>काठमाडौं। दुई हप्ताअघि बेपत्ता नेपालका लागि बेलायतका पूर्वराजदूत रिचार्ड मोरिस अझै भेटिएका छैनन्।</p>
<p>६ मेमा आफ्नो घर बेन्ट्ली नजिकैको पार्कमा बिहान दौडिन निस्किएका मोरिस बेपत्ता भएका थिए। गत हप्ता हेम्पसायर प्रहरी कार्यालयले खोजीका लागि सर्वसाधारणमा अपील जारी गरेको थियो।</p>
<p>हिजो पुनः अर्को अपील जारी गर्दै बेन्ट्ली वरपरका मानिसलाई आ-आफ्नो घर वरिपरिका झाडीमा केही शङ्कास्पद चिज भेटिए खबर गर्न भनिएको छ।</p>
<p>यस्तै उक्त दिन सोही क्षेत्र भई आवतजावत गरेका व्यक्तिको गाडीको ‘डेसक्याप’ पनि हेर्न अनुरोध गरिएको छ । गाडीमा जडित उक्त यन्त्रले बाहिरी वातावरणको दृश्य कैद गर्दछ।</p>
<p>रिचार्डको खोजीका लागि तालिमप्राप्त कुकुरहरू र हेलिकप्टरको पनि प्रयोग गरिएको छ। उनको घर नजिकैको जङ्गलमा प्रहरीको छुट्टै टोलीले खोजतलास तीब्र पारेको छ ।</p>
<p>परराष्ट्र मन्त्रालयका प्रवक्ताले प्रेस विज्ञप्ति जारी गरी कूटनीतिक क्षेत्रका एक अब्बल व्यक्ति गुमाएको र उनलाई अझै सकुशल अवस्थामा भेट्टाउने आशा रहेको व्यक्त गरेका छन्।</p>
<p>बेपत्ता रिचार्ड मोरिस नेपालका लागि सन् २०१५ देखि २०१९ सम्म राजदूतका रूपमा कार्यरत थिए। <em>रासस</em></p>
प्रतिक्रिया दिनुहोस्
.jpg)
