धनकुटा अस्पतालका स्वास्थ्यकर्मी र संक्रमित नर्सको सम्पर्कका बिरामीसमेत ८३ जनाको परीक्षण हुँदै
<p>विराटनगर। स्टाफ नर्समा कोभिड-१९ पुष्‍टि भएपछि धनकुटा अस्पतालमा कार्यरत स्वास्थ्यकर्मी र त्यहाँ आएका बिरामीसमेत गरी ८३ जनाको थ्रोट स्वाब नमूना संकलन गरिएको छ।</p>
<p>हिजै स्वाब संकलन गरेर प्रदेश प्रयोगशालामा पठाइएको र आजसम्ममा रिपोर्ट आइसक्ने जिल्ला अस्पताल धनकुटाका निमित्त मेडिकल सुपरिटेन्डेन्ट डा. पूजन विश्‍वकर्माले जानकारी दिएका छन्।</p>
<p>प्रदेश १ का सामाजिक विकास मन्त्री जीवन घिमिरेसहितको टोली हिजो धनकुटा गएको थियो। मन्त्री घिमिरेले संक्रमितको 'ट्राभल हिस्ट्री' र सम्पर्कमा रहेका व्यक्तिहरूको पहिचान गरी परीक्षण गर्ने बताएका छन्।</p>
<p>जिल्ला अस्पतालको प्रसूति विभागमा कार्यरत ३४ वर्षीया नर्समा कोरोना संक्रमण फेला परेपछि ४ जेठ साँझदेखि नै अस्पताललाई 'सिल' गरिएको छ।</p>
<p>अस्पताल आएका बिरामीबाटै उनी संक्रमित भएको हुनसक्ने आशंका गरी बिरामीको अभिलेख हेरेर 'कन्ट्याक्ट ट्रेसिङ' थालिएको धनकुटाका सहायक प्रमुख जिल्ला अधिकारी जयराम श्रेष्‍ठले जानकारी दिए।</p>
प्रतिक्रिया दिनुहोस्
.jpg)
