गाउँपालिका उपाध्यक्षले लगाइन् अध्यक्षमाथि अनियमितताको आरोप
<p>दार्चुला। दार्चुलाको मालिकार्जुन गाउँपालिकाकी उपाध्यक्षले गाउँपालिका अध्यक्षविरुद्ध जिल्ला प्रशासन कार्यालयमा उजुरी दिएकी छन्।</p>
<p>उपाध्यक्ष पुष्पा अवस्थीले अध्यक्ष नरेन्द्रसिंह धामीविरुद्ध आर्थिक अनियमितता तथा कोरोना भाइरस रोकथाम तथा नियन्त्रणमा मनपरी गरेको भन्दै प्रशासनमा उजुरी दिएकी हुन्।</p>
<p>उनले जिल्ला प्रशासन कार्यालयलाई लिखित उजुरी दिएकी हुन्। अध्यक्षले कर्मचारीलाई एकलौटी चलाउन खोजेको, भ्रष्टाचार गरेको र समन्वय नै नगरेको भन्दै उनले तीन दिनभित्र छलफल गराइदिन प्रशासनलाई अनुरोध गरेकी हुन्।</p>
<p>उनले राष्ट्रपति रनिङ्ग शिल्ड प्रतियोगिता, राष्ट्रपतिको मालिकार्जुन मन्दिर भ्रमणका लागि विनियोजन गरिएको रकमभन्दा दोब्बरका बिलहरू बनाएको, कोरोना भाइरसको नियन्त्रणका लागि बैठकबाट विनियोजित र अन्य गरी ६४ लाख बराबरको खर्च बिलहरू सन्तोषजनक नरहेको प्रशासनमा दिएको उजुरीमा उल्लेख गरेकी छन्। </p>
<p>क्वारेन्टाइनमा रहेकाको व्यवस्थापन, दीर्घरोगीलाई औषधि वितरण गर्नेजस्ता काममा समेत पक्षपात गरेको उनको आरोप छ।</p>
<p>कोरोनाको नाममा काम गरेको भन्दै भत्ता खाएको, जिल्लाबाहिर रहेका नागरिकलाई मद्दत गर्न नसकेको, विदेशमा अलपत्र परेकालाई फिर्ता ल्याउन नमानेको आरोपसमेत उनले लगाएकी छन्।</p>
<p>विभिन्न आठ बुँदामा उनले छानबिनको माग गरेकी हुन्। उपाध्यक्षले तीन दिनभित्र छलफल गरी निकास नदिए अध्यक्षसहित प्रमुख प्रशासकीय अधिकृत र लेखापालको कार्यकक्षमा तालाबन्दी गर्ने चेतावनी दिएकी छन्।</p>
प्रतिक्रिया दिनुहोस्
.jpg)
