बूढानीलकण्ठमा काेराेना संक्रमित भेटिएपछि तीनवटा वडा सिल गर्ने तयारी
<p>काठमाडाैं। काठमाडाैंको बूढानीलकण्ठ नगरपालिका-१२ बस्ने एक युवतीमा पीसीआर रिपोर्ट पोजिटिभ देखिएपछि नगरपालिकाका तीनवटा वडा सिल गर्ने तयारी गरिएको छ।</p>
<p>वडा नं १०, ११ र १२ का जनप्रतिनिधिको संयुक्त बैठकले नगर प्रमुखको सल्लाहबमोजिम आज राति १२ बजेदेखि तीनवटै वडा सिल गर्ने तयारी गरेको बैठकपछि जारी विज्ञप्तिमा उल्लेख छ।</p>
<p>यस अवधिमा कोही पनि घर बाहिर हिँडडुल गर्न नपाउने विज्ञप्तिमा उल्लेख छ।</p>
<p>सर्लाहीको रामनगर स्थायी घर भई हाल बूढानीलकण्ठ नगरपालिका-१२ स्थित तेन्जिङ चोकमा बसोबास गर्दै आएकी युवतीमा कोरोना भाइरस संक्रमण देखिएपछि उक्त क्षेत्र आजदेखि सिल गरिएको नगर प्रमुख उद्धवप्रसाद खरेलले जानकारी दिए।</p>
<p>शंकास्पद सातजनामा गरिएको परीक्षणमा एकजनामा संक्रमण देखिएको छ भने तीनजनाको परीक्षण नतिजा नेगेटिभ देखिएको छ। तीनजनाको नतिजा आउन बाँकी छ।</p>
<p>पीसीआर परीक्षण पोजेटिभ आएसँगै युवतीलाई शुक्रराज ट्रपिकल तथा सरुवा रोग अस्पताल टेकुको आइसोलेसनमा राखिएको छ।</p>
<p>युवतीको सम्पर्कमा आएका १५ जनाको पीसीआर परीक्षण गर्ने बताइएको छ। युवतीका आमा र भाइको रिपोर्ट भने नेगेटिभ आएको परिवारले जनाएको छ।</p>
<p>युवतीको परिवारले कपनमा फर्निचर व्यवसाय गर्दै आएको थियो।</p>
<p>लकडाउनका समयमा नेपालगञ्जबाट काठमाडौं आएका १२ जनालाई बूढानीलकण्ठ नगरपालिका-६ स्थित छहारी भवनमा राखिएको नगरपालिकाका प्रवक्ता नवराज भट्टराईले बताए।</p>
<p>भारतको विभिन्न ठाउँ हुँदै नेपालको सीमासम्म आइपुगेका ती व्यक्ति नेपालगञ्जमा रहेको क्वारेन्टाइमा बसी पत्रसहित सम्बन्धित जिल्ला पठाउने क्रममा काठमाडौं आइपुगेको बताइएको छ।</p>
<p>नेपालगञ्जबाट काठमाडौं आएका उक्त व्यक्तिको आरडीटी परीक्षण पहिले नै गरिएको भएता पनि स्वाब संकलन गरी पीसीआर परीक्षण गर्नुपर्ने भएकाले उनीहरूलाई क्वारेन्टाइनमा राखिएको नगर प्रमुख खरेलले बताए।</p>
<p>क्वारेन्टाइनमा राखिएकाहरू काभ्रे, सिन्धुपाल्चोक, काठमाडौं, रसुवा, नुवाकोट र सुर्खेतलगायत जिल्लाका छन्। <em>रासस</em></p>
प्रतिक्रिया दिनुहोस्
.jpg)
