कोरोना संक्रमणबाट मृत्यु भएका बाँकेका युवकको शव डोजरको बकेटमा !
<p>बाँके। कोराना भाइरसकाे संक्रमणबाट मृत्यु भएका दोस्रो व्यक्तिको ४ जेठमा अन्तिम संस्कार गरियो।</p>
<p>बाँकेको नरैनापुर गाउँपालिका-५, नयाँवस्तीका २५ वर्षीय युवकको हिजाे, ४ वैशाख राति साढे ९ बजे राप्ती नदी किनारमा लगेर गाडिएको थियो।</p>
<p>तर, उनको शव बाेक्नका लागि भने डोजर प्रयाेग गरिएकाे थियाे।</p>
<p>कुनै पनि एम्बुलेन्स वा शववाहनले उनको शव बोक्न नमानेपछि डोजरको बकेटमा हालिएकाे थियाे।</p>
<p>उनको शव व्यवस्थापन गर्ने सातजनाको टोलीले पीपीईलगायत सुरक्षित स्वास्थ्य सामग्री लगाएका थिए। </p>
<p>नरैनापुर गाउँपालिकाका प्रमुख प्रशासकीय अधिकृत मणिराम खरालले डोजरको बकेटमा लगेर शव गाडिएको बताए।</p>
<p>भगवानपुरको क्वारेन्टाइन खुल्ला ठाउँ र राप्ती नदीको किनारमा भएकाले त्यो समयमा अन्य साधनको व्यवस्थापन गर्न नसकिएकाले डोजरबाटै उठाएर शव लगिएको उनको भनाइ छ। </p>
<p>नेपालगञ्जबाट एम्बुलेन्स वा शववाहन आउन नमानेपछि विकल्पमा डोजरको प्रयोग गरिएको उनले बताए।</p>
<p>नरैनापुर गाउँपालिका-५ का वडाध्यक्ष कृष्णचन्द्र मौर्यले राप्ती नदीको किनार नजिकै भएकाले डोजरमा लगिएको बताए। “डोजरले पहिलै गएर शव गाड्ने खाडल खनेर तयार पार्‍यो, अनि बकेटमा बोकेर लगेर खाडलमा हालियो”, उनले भने। </p>
<p>सात फिट गहिरो खाडल खनेर शव गाडिएको उनको भनाइ छ। उनीहरूको धार्मिक संस्कारअनुसार नै शव खाडलमा गाडिएको वडाध्यक्ष मौर्यले बताए। </p>
<p>उनका अनुसार संक्रमित युवक बसेकाे दीपेन्द्र प्रावि भगवानपुरको क्वारेन्टाइनमा औषधि छर्किएको र क्वारेन्टाइन पूरै खाली गरिएको छ। त्यहाँ रहेका थप ३८ जनालाई वडा नम्बर ६ को जयकिसान माविको क्वारेन्टाइनमा राखिएको छ।</p>
प्रतिक्रिया दिनुहोस्
.jpg)
