काेराेना संक्रमितकाे मृत्यु भएपछि क्वारेन्टाइनमा रहेकाहरू बस्न मानेनन्, अन्यत्र सारियाे
<p>बाँके। एक युवकको कोरोना संक्रमणबाट निधन भएपछि बाँकेको नरैनापुर गाउँपालिका-५ स्थित दीपेन्द्र प्रावि क्वारेन्टाइनमा रहेकाहरूलाई पालको अस्थायी क्वारेन्टाइनमा सारिएको छ।</p>
<p>उक्त क्वारेन्टाइनमा रहेमा २५ वर्षीय युवकको हिजाे, ४ जेठमा मृत्यु भएपछि ३८ जनालाई जयकिसन माविको प्राङ्गणमा पालबाट अस्थायी क्वारेन्टाइन बनाई सारिएको नरैनापुर गाउँपालिका स्वास्थ्य शाखा प्रमुख मोहम्मद मोइन खाँले जानकारी दिए।</p>
<p>उनका अनुसार युवकको मृत्यु भएको दीपेन्द्र प्रावि क्वारेन्टाइनमा बस्न नमानेपछि सबैलाई जय किसान माविमा सारिएको हो।</p>
<p>जयकिसान माविमा यसअघि नै ६० जना रहेकाले दीपेन्द्र प्राविबाट सारिएकालाई प्राङ्गणमा पालको क्वारेन्टाइन बनाएर राखिएको छ। </p>
<p>नरैनापुर-५, मटेहियास्थित नयाँवस्तीका २५ वर्षीय युवकको हिजाे बिहान क्वारेन्टाइनमा निधन भएपछि त्यहाँ रहेकाहरूले आफूलाई अन्यत्र सार्नुपर्ने माग राख्दै आएका थिए।</p>
<p>गाउँपालिकाका प्रमुख प्रशासकीय अधिकृत मणिराम खरालले क्वारेन्टाइनमा हिजाे अचानक भएको निधनपछि क्वारेन्टाइनहरूलाई थप व्यवस्थित गर्दै स्वास्थ्यकर्मी र एम्बुलेन्स तयारी अवस्थामा राखिएको जानकारी दिए।</p>
<p>एक अस्थायी क्वारेन्टाइन थपिएसँगै नरैनापुरका १२ क्वारेन्टाइनमा अझै पनि ७५९ जनालाई राखिएको खरालको भनाइ छ।</p>
<p>सदरमुकाम नेपालगञ्जदेखि करीब ३५ किलोमिटर दक्षिण पूर्व राप्तीपारि अवस्थित नरैनापुरमा एकजनाको ज्यान जाने गरी ९ जनामा कोरोना संक्रमण देखिएपछि आवतजावत बन्द गरी संक्रमण न्यूनीकरणका लागि उच्च सुरक्षा सतर्कता अपनाइएको छ।<em> रासस</em></p>
प्रतिक्रिया दिनुहोस्
.jpg)
