धनकुटाकी स्टाफ नर्समा बिरामीबाट कोरोना संक्रमणको आशंका
<p>काठमाडौं। विराटनगर र धनकुटामा हिजो फेला परेका तीनजना संक्रमितको सम्पर्कमा रहेकाहरूको खोजी थालिएको छ।</p>
<p>धनकुटा अस्पतालमा कार्यरत स्टाफ नर्सलाई कोभिड-१९ देखिएपछि अस्पताल 'सिल' गरी त्यहाँ कार्यरत स्वास्थ्यकर्मी र चिकित्सकलाई क्वारेन्टाइनमा राखिएको धनकुटाका सहायक सीडीओ एवं कोभिड-१९ कमाण्ड फोर्सका सूचना अधिकारी जयराम श्रेष्‍ठले जानकारी दिए।</p>
<p>ती नर्सको सम्पर्कमा अस्पताल आएका बिरामीको अभिलेखको आधारमा 'कन्‍ट्याक्ट ट्रेसिङ' शुरू गरिएको श्रेष्‍ठले बताए।</p>
<p>बहिरङ्ग सेवाको इन्चार्ज रहेकी उनी अस्पतालको प्रसूति विभागमा काम गर्थिन्।</p>
<p>'ट्राभल हिस्ट्री' हेर्दा मंसीरदेखि अस्पताल र नजिकैको डेराभन्दा बाहिर नगएकोले अस्पतालमा आएका बिरामीबाटै संक्रमण भएको हुनसक्ने आशंका गरिएको छ।</p>
<p>यता हिजै संक्रमण भेटिएका विराटनगर-१५ हडतालीहाट क्षेत्रका ३५ वर्षका पुरुष र विराटनगर-६ का २९ वर्षीया महिलाको पनि 'ट्राभल हिस्ट्री' र सम्पर्कमा रहेका व्यक्तिहरूको खोजिका लागि टोली खटिएको प्रदेश १ कोभिड-१९ अनुगमन तथा प्रतिवेदन सचिवालय संयोजक ज्ञानबहादुर बस्नेतले जानकारी दिए।</p>
<p>"सबैजनाको अनुसन्धानमूलक प्रतिवेदन तयार गरी। परीक्षण तथा उपचारको रणनीति बनाउँछौं", बस्‍नेतले भने।</p>
<p>पुरुष विराटनगर महानगरपालिकाका सफाइ कर्मचारी र महिला माछा व्यापारी रहेको बताइएको छ।</p>
<p>महिला भने केही दिन अगाडि भारतबाट आएकी हुन्।</p>
प्रतिक्रिया दिनुहोस्
.jpg)
