क्याफेका ग्राहकलाई टाउकोमा ‘पुल नुडल्स’
<p>बर्लिन। जर्मनीको स्वेरिन शहरस्थित क्याफे रोथे हालै पुनः सञ्‍चालनमा आयो। कोरोना भाइरसको संक्रमण र लकडाउनका कारण आत्तिएका ग्राहकलाई क्याफेसम्म डोर्‍याउन सहज थिएन। त्यसैले सञ्‍चालकले नयाँ आइडिया फुराए, टाउकोमा तीन फिटका ‘पुल नुडल्स’ बाँधिदिने।</p>
<p>पोलिथिन फोमबाट बन्‍ने पुल नुडल्स पौडी पोखरीहरूमा प्रयोग हुने गर्छन्। हलुका हुने भएकाले क्याफेमा भौतिक दूरी कायम गर्न क्याफे रोथेका सञ्‍चालकले यसलाई प्रयोगमा ल्याएका हुन्।</p>
<p>ग्राहकमा कोरोना भाइरस प्रसार हुन नदिन भौतिक दूरी कायम गर्नु जरुरी थियो। टाउकोमा पुल नुडल्स तेर्स्याउन लगाएपछि भौतिक दूरी पनि कायम हुने भयो।</p>
<p>जर्मनीकी चान्सलर एन्जेला मर्केलको गृहराज्य मेकलबर्ग-वेस्टर्न पोमेरानियाको एक शहर हो, स्वेरिन। यस राज्यमा गत शनिबारदेखि लकडाउन हटाइएको छ। र, रेस्टुराँहरू खोल्न दिइएको छ।</p>
<p>तर, कोरोना भाइरसको जोखिम घटेको छैन। त्यसैले क्याफेले नारा नै बनाएको छ, सामाजिक दूरी कायम गरौं।</p>
<p>क्याफेले आफ्ना ग्राहकलाई परालबाट बनेको टोपी लगाउन दिन्छ। टोपीमै दुईवटा रंगिन ‘स्विमिङ नुडल्स’ बाँधिएको हुन्छ।</p>
<p>क्याफेका सञ्‍चालक ज्याकलिन रोथेले फेसबुक पेजमा पोस्ट गरेको तस्वीरमा उनका ग्राहक आफ्नो नयाँ हेडगियरसँगै रमाइरहेको देखिन्छ। तस्वीरको क्याप्सनमा उनले लेखेकी छन्, “आजको दूरी व्यवस्थापन”।</p>
<p>नौलो शैली अवलम्बन गरिँदा कफी, केक र बियरको स्वादमा रमाउन ग्राहक बढेको उनी बताउँछिन्। क्याफेका ५६ वटा टेबललाई रोथेले २० वटामा सीमित गरेकी छन्।</p>
प्रतिक्रिया दिनुहोस्
.jpg)
