विराटनगरका दुई संक्रमित सफाइ कर्मचारी र माछा व्यापारी
<p>विराटनगर। विराटनगरमा हिजो, ४ जेठमा दुई जना कोरोना संक्रमित भेटिएपछि आज बिहानैदेखि विराटनगर र आसपासको क्षेत्रमा लकडाउनलाई कडा पारिएको छ।</p>
<p>कोशी राजमार्ग र भित्री सडक तथा गल्लीहरूमा पनि सुरक्षाकर्मीको गस्ती बढाइएको छ।</p>
<p>लकडाउन केही खुकुलो बनाइएपनि संक्रमित फेला परेसँगै कडाइ गरिएको जिल्ला प्रहरी कार्यालय मोरङका प्रवक्ता तथा प्रहरी नायव उपरीक्षक मानबहादुर राईले बताए।</p>
<p>राईका अनुसार यसअघिका सवारी पास पनि खारेज गरिएको छ। औषधि पसल, पानी र दूधपसल मात्र खुला गरिएको छ।</p>
<p>यसअघि उदयपुरको त्रियुगामा विराटनगरका संक्रमित भेटिएपनि विराटनगरमै संक्रमण पुष्‍टि भएको भने यो पहिलोपटक हो।</p>
<p>हिजो विराटनगर-१५ हडतालीहाट क्षेत्रका ३५ वर्षका पुरुष र विराटनगर-६ का २९ वर्षीया महिलामा कोभिड-१९ देखिएको थियो।</p>
<p>पुरुष विराटनगर महानगरपालिकाका सफाइ कर्मचारी र महिला भने माछा व्यापारी रहेको बताइएको छ।</p>
<p>ती महिला केही दिन अगाडि भारतबाट नेपाल फर्केकी हुन्।</p>
<p>स्थानीय प्रशासनले संक्रमण देखिएपछि ती दुई क्षेत्र 'सिल' गर्ने निर्णय गरेको छ।</p>
प्रतिक्रिया दिनुहोस्
.jpg)
