सेनाले चीनसँग खरिद गरेको स्वास्थ्य सामग्री लिन आज राति निगमको वाइडबडी चीन जाँदै
<p>काठमाडौं। चीनबाट नेपाली सेनाले खरिद गरेको स्वास्थ्य सामग्री लिन नेपाल वायु सेवा निगमको वाइडबडी विमान आज राति चीन जाँदैछ।</p>
<p>राति १० बजेर ४५ मिनटमा विमान चीनको गोन्जाओ प्रस्थान गर्नेछ। </p>
<p>त्यहाँबाट सामान ल्याएर विमान भोलि बिहान ६ बजेर ३० मिनटमा त्रिभुवन अन्तर्राष्‍ट्रिय विमानस्थलमा अवतरण हुनेछ।</p>
<p>भन्सार प्रक्रिया पूरा गरेर सामानको पहिलो लट तयार भएपछि वाइडबडी चीनको गोन्जाओ जान लागेको हो।</p>
<p>पीसीआर परीक्षणका लागि चाहिने किट, पीपीई, एन-९५ मास्क, पञ्‍जालगायत अत्यावश्यक सामग्री विमानमा ल्याइने छ। </p>
<p>यसअघि सडकमार्गबाट आएको एकलट सामान काठमाडौं भित्रिसकेको छ। ओम्‍नी बिजनेस कर्पोरेसन इन्टरनेशनलसँग भएको सम्झौता रद्द गरेर सरकारले १६ चैतमा स्वास्थ्य सामग्री खरिद गर्ने जिम्मा सेनालाई दिएको थियो।</p>
<p>सेनाले जीटुजी प्रक्रियाबाट स्वास्थ्य सामग्री खरिदका लागि दुई अर्ब २५ करोड रुपैयाँभन्दा बढीको सम्झौता गरेको थियो। ६७ प्रकारका तीन सय ४३ टन स्वास्थ्य सामग्री खरिद गरिएको हो।</p>
प्रतिक्रिया दिनुहोस्
.jpg)
