भारतबाट उद्धार गरिएका ११८ जनालाई सम्बन्धित जिल्ला पठाइयाे
<p>कैलाली। भारतबाट उद्धार गरिएका विभिन्न जिल्लाका ११८ जनालाई आज धनगढीबाट सम्बन्धित जिल्लामा पठाइएको छ।</p>
<p>उनीहरूलाई जिल्ला प्रशासन कार्यालय कैलालीको समन्वयमा धनगढीका सामाजिक संघसंस्था र व्यवसायीको सहयोगमा सम्बन्धित जिल्ला जाने व्यवस्था गरिएको हो।</p>
<p>मध्य तराई हुँदै झापासम्म जाने ५० जना नेपालीका लागि झापा पुर्ख्यौली घर भएका उद्योगपति श्याम तायलले बसको व्यवस्था गरेका थिए।</p>
<p>मारवाडी सेवा समिति धनगढीले धनगढीबाट दाङ हुँदै पोखरासम्म जाने ४१ जनाका लागि बसको व्यवस्था गरेकाे थियाे।</p>
<p>त्यस्तै बैतडीका २९ जनालाई त्यहाँको स्थानीय तहले बस पठाएको थियो।</p>
<p>यसरी आज धनगढीबाट ११८ जना गन्तव्यतर्फ लागेका छन्। उनीहरूलाई खानाको व्यवस्था धनगढी उपमहानगरपालिकाले गरेको थियो।</p>
<p>त्यस्तै डोटीका सातजना, बाजुरा चार र अछामका एकजनाको भने उद्धार हुन सकेन। उनीहरूलाई धनगढीमै क्वारेन्टाइनमा राखिएको छ।</p>
<p>दिल्लीबाट ५२ दिनमा धनगढी आइपुगेका झापाका उत्तम सुवेदी घर जान पाउँदा अत्यन्त खुशी थिए। उनले बस उपलब्ध गराउने समाजसेवी र सामाजिक संघसंस्था र उद्धार तथा राहतका लागि समन्वय गर्ने स्थानीय प्रशासनलाई धन्यवाद दिए।</p>
<p>उनीहरूलाई धनगढी उपमहानगरपालिकाका वडा नम्बर ८ का अध्यक्ष नारायण बराल, मारवाडी सेवा समितिका अध्यक्ष राजेन्द्र अग्रवाल, उपाध्यक्ष अनिल भुजानियाले बिदाइ गरे।</p>
प्रतिक्रिया दिनुहोस्
.jpg)
