स्पेनिस क्लबले समूहमा अभ्यास गर्न पाउने
<p>काठमाडौं। कोभिड-१९ महामारीका कारण स्पेनको केही भागमा अझै कडा लकडाउन भए पनि स्पेनिस लिगका सबै क्लबहरूले यो साताबाट सामूहिक ट्रेनिङ गर्न पाउने भएका छन्।</p>
<p>देशका अन्य भागमा जस्तो मड्रिड र बार्सिलोनामा लकडाउन खुकुलो गरिएको छैन। तर, रियाल मड्रिड र बार्सिलोना क्लबले पनि दोस्रो चरणको सामूहिक अभ्यास गर्ने तयारी थालेका छन्।</p>
<p>स्पेनिस लिगले भाेलिबाट सानो-सानो समूहमा खेलाडीले प्रशिक्षण गर्न सक्ने बताएको छ। अहिलेसम्म खेलाडीलाई व्यक्तिगत ट्रेनिङ मात्र गर्न अनुमति थियो।</p>
<p>महामारीका कारण स्पेन सरकारले मार्चको मध्यबाट लागू गरेको लकडाउन विस्तारै खुकुलो बनाउँदै लगेको छ। तथापि सरकारले अपवादमा छुट दिइएको होइन भने रियाल मड्रिड र बार्सिलोनालाई समूहमा प्रशिक्षण गर्न छुट हुने छैन।</p>
<p>क्लबहरूले अब एक सेसनमा १० खेलाडीले सँगै प्रशिक्षण गर्न पाउनेछन्। जोखिम कम भएको स्थानको क्लबहरूमा भने १४ खेलाडीले प्रशिक्षण गर्न पाउनेछन्।</p>
<p>लकडाउन खुकुलो भएको क्षेत्रका क्लबहरूले आफ्नो क्षमताको ५० प्रतिशत सुविधा उपयोग गर्न पाउनेछन् भने अन्यले ३० प्रतिशतमात्र सुविधा प्रयोग गर्न पाउनेछन्।</p>
<p>सामाजिक दूरीको नियम पालना गरी खेलाडी र प्रशिक्षक टीमबीच हुने सामूहिक बैठक गर्न पनि छुट दिइने भएको छ। रेफ्रीहरूलाई पनि खेल सुविधामा ट्रेनिङ गर्न दिइने भएको छ।</p>
<p>अर्को चरणमा भने पूर्ण टीमलाई प्रशिक्षण गर्न दिइनेछ।</p>
<p>ट्रेनिङको अवधिमा सबै खेलाडी तथा प्रशिक्षकलाई स्वास्थ्य सुरक्षको मार्गनिर्देशनको कडाइका साथ पालना गर्न भनिएको छ। प्रशिक्षणमा खेलाडी, प्रशिक्षक तथा क्लबका अन्य कर्मचारीको दैनिक कोभिड-१९ परिक्षण गर्नुपर्नेछ।</p>
<p>स्पेनमा २ जुनबाट खाली रंगशालामा फुटबल शुरू गर्ने तयारी गरिएको छ। मिडियालाई खेल लाइभ गर्नमात्र प्रवेश दिइनेछ भने अभ्यास सत्रमा प्रवेश दिइने छैन।</p>
<p>यसै साताबाट जर्मन बुन्डेसलिगा भने शुरू भएको छ। यससँगै महामारीपछि शुरू हुने बुन्डेसलिगा युरोपको पहिलो ठूलो लिग बनेको छ। स्पेनमा कोभिड-१९ कारण २७ हजारभन्दा धेरैको मृत्यु भइसकेको छ।</p>
प्रतिक्रिया दिनुहोस्
.jpg)
