पृतनापति र सैनिक चिकित्सकलाई कोरोना संक्रमण देखिएपछि मध्यपूर्वी पृतना ब्यारेक 'सिल'
<p>काठमाडौं। महोत्तरीको बर्दिवास नगरपालिकामा रहेको नेपाली सेनाको मध्यपूर्वी पृतनाको ब्यारेक 'सिल' गरिएको छ।</p>
<p>मध्यपूर्वी पृतनापती उपरथी र सेनाकै चिकित्सकमा कोरोना संक्रमण पुष्टि भएपछि ब्यारेक सिल गरिएको महोत्तरीका प्रमुख जिल्ला अधिकारी सुर्यबहादुर खत्रीले जानकारी दिए।</p>
<p>“सेनामा अनुशासन कडा नै हुन्छ। सर्वसाधारण जस्तै निगरानी गरिरहन पर्दैन”, उनले भने,“तर, पनि संक्रमणको जोखिम नियन्त्रण गर्न 'सिल' गरिएको हो।”</p>
<p>उनले त्यहाँ रहेका सबै सैनिक कर्मचारीको पीसीआर नमूना परीक्षणको रिपोर्ट नआउन्जेलसम्म कसैलाई पनि हिँडडुल गर्न रोक लगाइएको छ।</p>
<p>त्यस्तै ब्यारेकभित्र बस्ने हरेक सैनिक कर्मचारीलाई आवश्यक सुरक्षा अपनाउन र सामाजिक दूरीमा बस्न भनिएको छ।</p>
<p>मध्यपूर्वी पृतनाका प्रमुख उपरथी र स्वाब संकलनमा खटिने गरेका चिकित्सकलाई नै संक्रमण देखिएको हो।</p>
<p>“सुरक्षा निकायका उच्च अधिकारीहरू नै संक्रमण देखिनु यस प्रदेशमा चिन्ताको विषय हो”, सुरक्षा निकायका एक अधिकृतले भने-“अरुको तुलनामा उहाँहरूले धेरै सतर्कता अपनाइरहनु भएको हुन्छ। तर पनि संक्रमण भयो। त्यसैले प्रदेश २ मा जोखिम बढिसकेको छ।”</p>
<p>स्वास्थ्य तथा जनसंख्या मन्त्रालयले हिजो दिउँसो गरेको नियमित मिडीया ब्रिफिङका क्रममा महोत्तरीका ५२ वर्षीय र काभ्रेका २६ वर्षीय पुरुषमा संक्रमण पुष्टि भएको जानकारी दिएको थियो।</p>
<p>५२ वर्षीय मध्यपूर्वी पृतनाका पृतनापति हुन्। भने २६ वर्षीय पुरुष नेपाली सेनाका चिकित्सक हुन्।</p>
<p>उनीहरू दुवैजनालाई हिजो नै महोत्तरीबाट काठमाडौं ल्याएर सशस्त्र प्रहरी बलको बलम्बुस्थित अस्पतालको आइसोलेसनमा राखेर उपचार भइरहेको छ।</p>
<p>पृतनापती र चिकित्सकको कन्ट्याक्ट ट्रेसिङको कामसमेत शुरु गरिएको छ।</p>
प्रतिक्रिया दिनुहोस्
.jpg)
