पाँच दिनअघि भारतबाट आएका थिए रौतहटका १० जना संक्रमित
<p>काठमाडौं। रौतहटमा आज कोभिड-१९ पुष्टि भएका दशजना नै पाँच दिनअघि भारतको महाराष्ट्रका विभिन्न शहरबाट नेपाल आएको खुलेको छ।</p>
<p>उनीहरू लकडाउनकै समयमा सीमा क्षेत्रमा आएका थिए। राजपुर नगरपालिकाका मेयर मोहमद सकिल अख्तका अनुसार उनीहरू दशजना नै मुम्बई, गुजरात लगायतका शहरबाट आएको खुलेको छ।</p>
<p>सीमामै उनीहरूको थ्रोट स्वाब नमूना संकलन गरी काठमाडौं परीक्षणको लागि ल्याइएको थियो। र, सिधै क्वारेन्टाइनमा ल्याएर राखिएको थियो।</p>
<p>मेयर सकिलका अनुसार नाकाबाट सोझै उनीहरूलाई रौतहटको इशानाथ, परोहा र राजपुरमा रहेको क्वारेन्टाइनमा राखिएको हो।</p>
<p>स्वास्थ्य तथा जनसंख्या मन्त्रालयका अनुसार रौतहट राजपुर नगरपालिका फरहदवा-९ का सातजना र इशनाथ नगरपालिका-३ र ५ का तीनजनामा कोभिड-१९ पुष्टि भएको हो।</p>
<p>यो सहित रौतहटमा संक्रमितको संख्या १३ पुगेको छ। यसअघि तीनजना संक्रमित पुष्टि भइसकेका छन्। ती मध्ये एकजना निको भएर घर फर्किसकेका छन्।</p>
<p>आज बिहान सवा ७ बजे अद्यावधिक गरिएको विवरण अनुसार राजपुर नगरपालिका फरहदवा-९ का १८, ३२, ३६, ३९ (दुईजना) ४२, ४८ वर्षका पुरुष छन्।</p>
<p>त्यस्तै रौतहटका इशनाथ नगरपालिका ३ र ५ निवासी २८, ३० र ३३ वर्षीय पुरुषमा पनि संक्रमण पाइएको छ।</p>
<p>टेकुस्थित राष्ट्रिय जनस्वास्थ्य प्रयोगशालामा गरिएको परीक्षणमा उनीहरूको नतिजा पोजिटिभ देखिएको स्वास्थ्य मन्त्रालयले जनाएको छ।</p>
<p>मन्त्रालयका अनुसार सबैजनाको स्वास्थ्य अवस्था सामान्य रहेको र उनीहरू स्वास्थ्यकर्मीको सम्पर्कमा छन्।</p>
<p>कोरोना संक्रमणबाट हिजो सिन्धुपाल्चोककी २९ वर्षीया सुत्केरीको मृत्यु भएको छ। कोभिड–१९ बाट मृत्यु हुने उनी पहिलो व्यक्ति हुन्।</p>
<p>नेपालमा संक्रमितको संख्या २९१ पुगेको छ। अहिलेसम्म ३६ जना संक्रमित निको भएर घर फर्किसकेका छन्।</p>
प्रतिक्रिया दिनुहोस्
.jpg)
