घरमा आगलागी हुँदा रुकुमपश्चिममा महिलाको मृत्यु
<p>रुकुमपश्चिम। रुकुमपश्चिममा आगलागीमा परी आज बिहान एक महिलाको मृत्यु भएको छ। आठबीसकोट नगरपालिका-३, खदिकी ३५ वर्षीया लाली बोहरा देवकोटाको मृत्यु भएको हो।</p>
<p>डम्बर देवकोटाको तीनतले घरमा अकस्मात आगलागी हुँदा भान्साकोठामा खाना बनाइरहेकी बोहराको मृत्यु भएको जिल्ला प्रहरी प्रमुख प्रहरी नायव उपरीक्षक ठगबहादुर केसीले बताए।</p>
<p>उनका अनुसार घरमा स्टोर गरेर राखिएको पेट्रोलियम पदार्थ लिक भई आगलागी भएको प्रारम्भिक अनुमान गरिएको छ।</p>
<p>आगलागीबाट घरका सम्पूर्ण सामग्री जलेर नष्ट भएको प्रहरीले बताएको छ। प्रहरी र स्थानीयवासीको सहयोगमा आगो नियन्त्रणमा लिइएकाले परिवारका अन्य सदस्य भने सामान्य छन्।</p>
<p>आगलागीको थप अनुसन्धान भइरहेको प्रहरीको भनाइ छ। <em>रासस</em></p>
प्रतिक्रिया दिनुहोस्
.jpg)
