बागलुङबाट पर्सा गएका मजदुरमा काेभिड-१९ देखिएपछि उनीहरूकाे सम्पर्कमा आएकाको जाँच हुँदै
<p>बागलुङ। गलकोट नगरपालिकाबाट पर्सा गएका १४ मजदुरमा कोरोना संक्रमण देखिएपछि उनीहरूको सम्पर्कमा आएका व्यक्तिहरूमा कोरोना जाँच हुँदैछ।</p>
<p>‘कन्ट्याक्ट ट्रेसिङ’ गर्दा पत्ता लागेका १०९ जनाको स्वाब संकलन गरी जाँचका लागि पोखरास्थित जनस्वास्थ्य प्रयोगशालामा पठाइएको हो।</p>
<p>स्वास्थ्य कार्यालयका प्रमुख सुरज गुरौका अनुसार भाेलि साँझसम्ममा सबै जाँचको रिपोर्ट आउनेछ। क्वारेन्टाइनमै बसिरहेका ती मजदुरमा गलकोटबाट बस चढेर गएको १९ दिनपछि कोरोना संक्रमण पुष्टि भएको थियो।</p>
<p>नगरपालिकाले बस चढाइ पठाएका ८० मजदुरमध्ये १४ जनामा कोरोना देखिएको थियो।</p>
<p>सबै मजदुर निर्माणका क्षेत्रमा काम गर्थे। हिजाे र आज गरी चार वडामा स्वाब सङ्कलन गरिएको थियो।</p>
<p>वडा नं ३ मा २६, ५ मा २९, ६ र ७ मा गरी ५५ जनाको स्वाब लिइएको वडा नं ३ का अध्यक्ष वीरजंग भण्डारीले जानकारी दिए। जनप्रतिनिधि, स्वास्थ्यकर्मी, कर्मचारी, सर्वसाधारणलगायत गरी १०९ जनाको स्वाब सङ्कलन गरिएको छ।</p>
<p>जिल्लाबाट गएका मजदुरमा कोरोना संक्रमण पुष्टि भएपछि स्थानीयवासीमा त्रास छाएको थियो। यद्यपि उनीहरूको संक्रमणको स्रोतबारे केही थाहा हुन सकेको छैन।</p>
<p>गत चैतमा भेटिएका दुई संक्रमित उपचारपछि निको भई घर फर्केयता जिल्लामा थप संक्रमित भेटिएका छैनन्। संक्रमण रोक्न उच्च सतर्कता अपनाइएको छ। बन्दाबन्दीलाई झन् कडा तुल्याइएको छ। <em>रासस</em></p>
प्रतिक्रिया दिनुहोस्
.jpg)
