कोरोना कहरबीच बागलुङमा डेंगीकाे डर
<p>बागलुङ। कोरोना कहर मत्थर नहुँदै जिल्लामा देखिएको डेंगी संक्रमणले झस्काएको छ। डेंगी र कोरोना भाइरसबाट सँगैसँगै जोगिनुपर्ने भएको छ।</p>
<p>डेंगी ‘एडिस एजिप्टाई’ जातको पोथी लामखुट्टेको टोकाइबाट सर्छ। धाैलागिरि अस्पतालमा उपचाररत जैमिनी नगरपालिका-८ की २३ वर्षीया युवतीमा हिजाे, २ जेठमा डेंगी लागेको पुष्टि भएको छ। </p>
<p>“बिरामीमा शङ्कास्पद लक्षण देखिएपछि जाँच गर्दा डेंगीको संक्रमण भेटियो”, अस्पतालका प्रमुख चिकित्सक शैलेन्द्र विक पोखरेलले भने। संक्रमित युवती गत २९ वैशाखमा अस्पताल भर्ना भएकी थिइन्।</p>
<p>युवतीको अवस्था स्थिर रहेको र थप जाँच गरिने प्रमुख चिकित्सक पोखरेलकाे भनाइ छ। उनले गर्मी बढेसँगै डेंगीकाे जोखिम थपिएकाले सावधानी अपनाउन सबैमा आग्रह गरेका छन्।</p>
<p>“लामुखुट्टेको टोकाइबाट बच्नु नै उत्तम उपाय हो, सुत्दा झुल टाँग्ने गरौँ, घर वरिपरि पानी जम्ने खाल्डाखुल्डी छन् भने पुरौँ”, उनले भने।</p>
<p>सो जातको लामखुट्टेले दिउँसो मात्र टोक्ने भएकाले बाहिर हिँडडुल गर्दा लामो बाहुला भएको लुगा लगाउन, पानी जम्ने पुराना भाँडाकुँडा, ड्रम, टायर आदिलाई घर छेउछाउ नराख्न सुझाव दिए।</p>
<p>स्वास्थ्य कार्यालयका प्रमुख सुरज गुरौले हिजाे फेला परेको संक्रमण यो वर्षको पहिलो भएको उल्लेख गरे। उनका अनुसार गत वर्ष जिल्लाका १० जना व्यक्तिमा डेंगी संक्रमण पुष्टि भएको थियो।</p>
<p>“संक्रमित भेटिएको ठाउँमा ‘खोज र नष्ट’ गर अभियान सञ्चालन हुँदैछ, सम्बन्धित स्थानीय तह र स्वास्थ्यचौकीसँग समन्वय भइरहेको छ”, प्रमुख गुरौले भने। लामखुट्टेको सम्भावित बासस्थानको खोजी गरी नष्ट गरिने उनको भनाइ छ।</p>
<p>उनले डेंगी फैलन नदिन घर तथा बसोबास क्षेत्रको सरफाइमा विशेष ध्यान दिनुपर्ने बताए। डेंगीविरुद्धको अभियानमा स्थानीय तहको भूमिका र पहल महत्त्वपूर्ण हुने प्रमुख गुरौको भनाइ छ।</p>
<p>स्वास्थ्य कार्यालयले गत वर्ष पनि सदरमुकामलगायतका ठाउँमा ‘माइकिङ’, सन्देशमूलक पर्चा वितरणदेखि सञ्चारमाध्यममार्फत् सचेतना जगाउने काम गरेको थियो।</p>
<p>डेंगीको परीक्षण सेवा धाैलागिरि अस्पतालमा मात्र उपलब्ध छ। शङ्कास्पद देखिएका व्यक्तिमा डेंगी परीक्षण हुँदै आएको छ।</p>
<p>डेंगी जाँचका लागि परीक्षण किटको अभाव नरहेको अस्पतालले जनाएको छ। चिकित्सकका अनुसार डेंगीको संक्रमणपछि एक्कासि उच्च ज्वरो आउने, रक्तश्राव हुने, टाउको, शरीर दुख्नेजस्ता लक्षण देखा पर्छन्।</p>
<p>डेंगीको खास उपचार नभएकाले लक्षणअनुसार औषधि चलाउने गरिन्छ। गत महीना छिमेकी जिल्ला म्याग्दीमा पनि डेंगी देखिएको थियो।</p>
<p><em><strong>- रामबहादुर थापा/रासस</strong></em></p>
प्रतिक्रिया दिनुहोस्
.jpg)
