धुलिखेल अस्पतालमा सुत्केरीको मृत्यु- पीसीआर परीक्षण गरियो, नतिजा आउन बाँकी
<p>काठमाडौं। काभ्रेको धुलिखेल अस्पतालमा एक सुत्केरीको मृत्यु भएको छ।</p>
<p>कोरोनाको पनि उपचार हुने गरी तोकिएको धुलिखेल अस्पतालमा उनको बिहीबार राति मृत्यु भएको अस्पतालका फोकल पर्सन नरेन्द्र झाले पुष्टि गरे।</p>
<p>सिन्धुपाल्चोकको बाह्रबिसे नगरपालिका-९ घर भएकी २९ वर्षीया उनको मृत्युको कारण भने खुलेको छैन। त्रिवि शिक्षण अस्पतालमा नौ दिनअघि सुत्केरी भएकी उनलाई अस्पतालबाट घर फर्केपछि श्‍वासप्रश्‍वासमा समस्या भएको भन्दै धुलिखेल अस्पताल ल्याइएको थियो।</p>
<p>उनको अस्पतालमा मृत्यु भएको धुलिखेल अस्पतालका डा. रमेश मकाजु श्रेष्ठले पनि पुष्टि गरे।</p>
<p>“हामीले मृत्यु भएकी महिलाको कोराना परीक्षण पनि गरिरहेका छौंं,” उनले भने, “दिउँसोसम्म रिपोर्ट आएपछि मात्रै मृत्युको कारण यकिन गर्न सकिन्छ।”</p>
<p>अस्पतालका प्रवक्ता डा. सुमन ताम्राकारले स्वास्थ्य तथा जनसंख्या मन्त्रालयले नै उनको मृत्युको कारणबारे जानकारी दिने बताए। मृतकको शव अहिले धुलिखेल अस्पतालमै छ।</p>
<p>काठमाडौं महाराजगञ्‍जस्थित त्रिवि शिक्षण अस्पतालमा सुत्केरी भएपछि उनलाई बाह्रबिसे ल्याइएको र श्‍वासप्रश्‍वासमा समस्या देखिएपछि धुलिखेल लगिएको जानकारी प्राप्त भएको सिन्धुपाल्चोकका जनस्वास्थ्य प्रमुख दुर्गादत्त चापागाईंले बताए। उनका अनुसार बाह्रबिसे स्वास्थ्यकेन्द्रले धुलिखेल अस्पताल रेफर गरेको थियो । धुलिखेल अस्पताल पुर्‍याउनासाथ उनको मृत्यु भएको चापागाईंले जानकारी दिए ।</p>
प्रतिक्रिया दिनुहोस्
.jpg)
