पालुङबाट आमाबुवासँग हिँडेरै आएका थिए सतुंगलका संक्रमित ७ वर्षीय बालक
<p>काठमाडौं। कोरोना संक्रमण देखिएका चन्द्रागिरी नगरपालिका-१० सतुंगलका सात वर्षीय बालक आमाबुवासँग पैदलै मकवानपुरको पालुङबाट आएको पुष्टि भएको छ।</p>
<p>पालुङ घर भएका बालकका परिवार सतुंगलमा डेरा गरेर बस्दै आएका थिए। २९ वैशाखमा त्यहाँबाट हिँडेरै उनीहरू लकडाउनको समयमा सतुंगल पुगेको वडाध्यक्ष गोपालकृष्ण महर्जनले जानकारी दिए।</p>
<p>“लकडाउनको समयमा बाहिरबाट आएको भनेर छिमेकीले वडामा खबर गरेका हुन्,” उनले भने, “त्यसपछि हामीले उनीहरूलाई जाँच गर्न पठाएका थियौं। बालकमा शुक्रबार रिपोर्ट पोजिटिभ देखियो। आमाको रिपोर्ट भने नेगेटिभ आएको छ।”</p>
<p>वडाध्यक्ष महर्जनले बालकका बुवाले भने अझै नमूना परीक्षण नगराएको बताए। ती बालकको कन्ट्रयाक्ट ट्रेसिङ भइरहेको छ।</p>
<p>स्थानीय प्रशासनले बालक बस्दै आएको घर दुई साताका लागि सिल गरेको छ। आसपास क्षेत्रमा आवातजावत पनि बन्द गरिएको वडा कार्यालयले जनाएको छ। संक्रमित बालक र आमाको बलम्बुस्थित एपीएफ अस्पतालको आइसोलेसनमा उपचार भइरहेको छ।</p>
प्रतिक्रिया दिनुहोस्
.jpg)
