बाँदरमा गरिएको परीक्षणबाट कोरोना भाइरसविरुद्ध खोप तयार हुने आशा
<p>लन्डन। वैज्ञानिकहरूले मकाक प्रजातिका बाँदरमा गरिएको एक खोप परीक्षणमा कोभिड-१९ विरुद्धको लडाईंमा सफलता मिल्ने आशा गरेका छन्।</p>
<p>उक्त प्रजातिका ६ वटा बाँदरमा गरिएको परीक्षणमा सकारात्मक नतिजा आएको वैज्ञानिकहरूको दाबी छ।</p>
<p>मानिसमा पनि क्लिनिकल परीक्षण गर्ने तयारीमा रहेका वैज्ञानिकहरू सकारात्मक परिणामको आशामा देखिन्छन्।</p>
<p>पहिले बाँदरको एक समूहलाई सार्स-कोभ-२ को संक्रमण गराइयो। अनि लगत्तै खोप दिइयो। त्यसरी खोप दिइएका बाँदरको फोक्सो र श्‍वासनलीमा भाइरसको मात्रा कम पाइएको छ।</p>
<p>बीबीसीका अनुसार यो परीक्षण अमेरिकामा गरिएको हो। र, यसमा अमेरिकी सरकारको नेसनल इन्स्टिच्युट अफ हेल्थ तथा बेलायतको युनिभर्सिटी अफ अक्सफोर्डका वैज्ञानिकहरू सहभागी छन्।</p>
<p>उक्त खोपले निमोनियाबाट जनावरलाई बचाउन पनि सहयोग पुग्‍ने वैज्ञानिकहरूको भनाइ छ। बाँदरको ‘रेसस मकाक’ प्रजाति र मानिसको रोग प्रतिरोधात्मक प्रणाली एकै प्रकारको हुन्छ।</p>
<p>यो अध्ययनलाई अन्य वैज्ञानिकहरूबाट समीक्षा गराइएको छैन। तर, लन्डन स्कुल अफ हाइजिन एन्ड ट्रपिकल साइन्सका प्राध्यापक स्टेफन इभान्सले ‘उच्च गुणस्तर’ र ‘धेरै उत्साहवर्द्धक’ समाचारका रूपमा अर्थ्याएका छन्।</p>
<p>अक्सफोर्ड युनिभर्सिटीमार्फत एक सय जनाभन्दा बढी स्वयंसेवकमा खोपको परीक्षण भइरहेको छ। र, एक सयभन्दा बढी कोरोना भाइरस परीक्षण खोप विकास गरिएको छ।</p>
प्रतिक्रिया दिनुहोस्
.jpg)
