क्वारेन्टाइन र आइसोलेसनले जनमानसमा पारेकाे मनोवैज्ञानिक प्रभावबारे सर्वेक्षण शुरू
<p>काठमाडौं। नेपाल स्वास्थ्य अनुसन्धान परिषद्ले कोभिड-१९ का कारण जनमानसमा क्वारेन्टाइन र आइसोलेसनले पार्न गएको मनोवैज्ञानिक प्रभावबारे सर्वेक्षण शुरू गरेको छ।</p>
<p>अहिलेको महामारीको रूपमा चलिरहेको कोभिड-१९ लाई ध्यानमा राख्दै परिषद्ले सर्वेक्षण गर्न लागेको जनाएको हो।</p>
<p>परिषद्का अनुसार यो सर्वेक्षणले मनोवैज्ञानिक प्रभावबारे जानकारी हासिल हुने र त्यसबाट नीति निर्माणमा सहयोग पुग्ने विश्वास लिएको छ।</p>
<p>यो सर्वेक्षणमा सहभागी हुन १० मिनेट समय लाग्ने परिषद्ले जनाएको छ।</p>
<p>कोभिड-१९ का विषयमा जानकारी लिन सूचना हासिल गर्न स्वास्थ्य तथा जनसंख्या मन्त्रालयले तयार पारेको भाइबर ग्रुप, मोबाइल एप तथा वेबपेजमा यसका बारेमा जानकारी उपलब्ध गराइएको छ।</p>
<p>परिषद्ले चैत महीनामा विदेशबाट नेपाल फर्किएका र अन्य कारणले क्वारेन्टाइन तथा आइसोलेसनमा रहेका सबै व्यक्तिलाई सर्वेक्षणमा सहभागी हुन भनेको छ।</p>
<p>त्यस्तै क्वारेन्टाइन र आइसोलेसनमा बसिसकेर निस्केको सात दिन पूरा भएका व्यक्तिले पनि सहभागी हुन आग्रह गरेको छ।</p>
<p>सर्वेक्षणका लागि ३५ वटा प्रश्नहरू समावेश गरिएका छन्। सर्वेक्षणमा सहभागिता स्वेच्छिक हुने परिषद्ले जनाएको छ।</p>
<p>सहभागीहरूले जवाफ दिन नचाहेको प्रश्न खाली छोड्न सक्नेछन्।</p>
<p>सर्वेक्षणमा सहभागी हुनुअघि सूचना फारम तथा सहमति पत्रमा स्वीकृति दिनुपर्नेछ।</p>
<p>सर्वेक्षणमा सहभागीको नाम, उमेर, धर्मलगायत विविध किसिमका ३५ वटा प्रश्नावली राखिएका छन्।</p>
प्रतिक्रिया दिनुहोस्
.jpg)
