दाङमा पहिलोपटक भेटिएका तीन संक्रमितमध्ये दुईजना भारतबाट आएका थिए
<p>काठमाडौं। कर्णाली प्रदेशबाहेकका ६ वटा प्रदेशका २४ जिल्लामा मात्रै देखिएको काेराेना संक्रमण दाङमा पनि पुष्टि भएसँगै अब संक्रमण देखिएकाे जिल्ला २५ पुगेकाे छ।</p>
<p>राप्ती स्वास्थ्य विज्ञान प्रतिष्ठान दाङमा गरिएको परीक्षणमा दुईजना र भेरी अञ्चल अस्पताल नेपालगञ्जमा गरिएको परीक्षणमा एकजना गरेर दाङमा आज पहिलोपटक तीनजनामा संक्रमण देखिएको हाे।</p>
<p>राप्तीमा पोजिटिभ देखिएपछि दुईजनाकै क्रस जाँच गर्न नेपालगञ्ज नमूना पठाइएको थियो। त्यहाँ पनि परीक्षण रिपाेर्ट पोजिटिभ आएको हो।</p>
<p>दाङका प्रमुख जिल्ला अधिकारी गोविन्दप्रसाद रिजालले राप्ती स्वास्थ्य विज्ञान प्रतिष्ठानमा जाँच गर्दा पोजिटिभ देखिएका दुईजना दाङको गढवा गाउँपालिका ४ र ५ का रहेको बताए।</p>
<p>अर्का युवकको ट्राभल हिस्ट्री अहिले नै जानकारी भइनसकेको उनकाे भनाइ छ।</p>
<p>तुलसीपुर उपमहानगरपालिका-७ का ३४ वर्षीय युवकको भने भेरी अञ्चल अस्पतालमा नमूना परीक्षण भएको थियो। गढवाका २३ र ३६ वर्षीय युवक हुन्। उनीहरू दुवैजना भारतको मुम्बईबाट आएका थिए।</p>
<p>ती दुवैजना कपिलवस्तुको कृष्णनगर सीमा नाका भएर प्रवेश गरेका थिए। त्यहाँ उनीहरू सातदिन क्वारेन्टाइनमा बसेका थिए। पछि त्यहाँबाट गढवा गाउँपालिकाले गढवा उद्योग वाणिज्य संघको एम्बुलेन्स पठाएर उनीहरूलाई उद्धार गरेको थियो।</p>
<p>उक्त एम्बुलेन्समा पाँचजना आएका थिए। एकजना भने बाटोमै झरेका थिए।</p>
<p>चारजनाको नमूना संकलन भएको थियो। तीमध्ये दुईजनाको रिपोर्ट पोजिटिभ देखिएको छ।</p>
<p>प्रतिष्ठान, लमही अस्पताल र जिल्ला स्वास्थ्य कार्यालय प्युठानबाट संकलन भएका ९१ वटा नमूनामध्ये ८९ मा नगेटिभ र दुईजनामा पोजिटिभ देखिएको छ।</p>
<p>आज बेलुकीको अद्यावधिक विवरणअनुसार नेपालमा कोरोना संक्रमितको संख्या २६७ पुगेको छ। दाङका विभिन्न स्थानमा अहिले साँझसम्म ९७ जना क्वारेन्टाइनमा रहेको जिल्ला प्रशासन कार्यालयले जनाएको छ।</p>
प्रतिक्रिया दिनुहोस्
.jpg)
