काठमाडौंमा भोलिदेखि पैदल यात्रीलाई पनि पास अनिवार्य
<p>काठमाडौं। लकडाउनलाई थप कडाइ गर्दै काठमाडौंमा पैदल यात्रीलाई पनि पास अनिवार्य गरिने भएको छ।</p>
<p>जिल्ला प्रशासन कार्यालयमा आज बसेको जिल्ला सुरक्षा समितिको बैठकले पास नभएका सवारी र पैदल यात्रुलाई काठमाडौं प्रवेशमा रोक लगाउने निर्णय गरेको हो।</p>
<p>एम्बुलेन्स, शव वाहन, औषधि तथा स्वास्थ्य सामग्रीहरु, सबै प्रकारका औद्योगिक कच्चा पदार्थ र तयारी मालवस्तु, पेट्रोलियम पदार्थ, ग्याँस, खाद्य वस्तु, पशुपंक्षीजन्य आहारा, खसी बोका, राँगा, कुखुरा, माछा, तरकारी, फलफूल, निर्माण सामग्रीहरु बोकेका सवारीसाधनहरुलाई भने पास अनिवार्य छैन।</p>
<p>काठमाडौंका मूल सडक, भित्री सडक तथा गल्लीहरुमा विभिन्न बहानामा मानिसहरूको अनावश्यक भीडभाड हुने गरेको पाईएको भन्दै प्रशासनले त्यसो नगर्न अनुरोध गरेको छ।</p>
<p>भित्री सडक र गल्लीमा भेला भएमा कारवाहीका लागि नियन्त्रणमा लिइने प्रशासकीय अधिकृत मानबहादुर बुढाले बताए।</p>
<p>सवारी पास आवश्यक पर्ने व्यक्ति तथा संस्थाहरुले आ-आफ्नो नियामक निकायहरुमा सम्पर्क गर्न प्रशासनले सूचनामार्फत अनुरोध गरेको छ।</p>
<p>सञ्चारकर्मीहरु तथा मिडिया हाउसहरुले सञ्चार तथा सूचना प्रविधि मन्त्रालय र नियामक निकाय नतोकिएकाको हकमा जिल्ला प्रशासन कार्यालय काठमाडौंमा सम्पर्क राख्न अनुरोध गरिएको छ।</p>
<p>प्रशासनले यस अघि विभिन्न मितिमा जारी गरिएका सम्पूर्ण सवारी पासहरू पनि खारेज गरिएको छ।</p>
<p>निर्माण सामाग्री बोकेका हेभी सवारीलाई राति ८ बजेदेखि बिहान ६ बजेसम्म आवतजावत गर्न दिइने बताइएको छ।</p>
प्रतिक्रिया दिनुहोस्
.jpg)
