कोरोना रोकथाम तथा उपचारमा सुदूरपश्चिम खटाइएका ३३ चिकित्सक काठमाडौं फर्कदैँ
<p>कैलाली। कोरोना भाइरस संक्रमण रोकथाम, नियन्त्रण तथा उपचारका लागि केन्द्र सरकारबाट सुदूरपश्‍चिम प्रदेशमा खटाइएका ३३ जना आवासीय चिकित्सक आज काठमाडौं फर्किने भएका छन्।</p>
<p>गत ५ वैशाखमा यती एयरको जहाज चार्टर्ड गरेर स्वास्थ्य मन्त्रालयले ती चिकित्सकहरूलाई धनगढी पठाएको थियो।</p>
<p>काठमाडौंबाट आएका ३३ जना डाक्टरहरु आज काठमाडौँ फर्किन लागेको सामाजिक विकास मन्त्रालयका सूचना अधिकारी हेमराज खड्काले <em>देखापढी</em>लाई बताए ।</p>
<p>सरकारी छात्रवृत्तिमा पढिरहेका ३३ आवासीय चिकित्सकमध्ये १४ जना सेती प्रादेशिक अस्पताल, ४ जना महाकाली अञ्चल अस्पताल एवं अछाम, डडेल्धुरा र बझाङ अस्पतालमा तीन/तीन जना खटाइएको थियो।</p>
<p>त्यस्तै, बैतडी, दार्चुला र कैलालीको टीकापुरमा दुई/दुई जना खटाइएको थियो। उक्त टोलीमा इन्टरनल मेडिसिनका १६ जना डाक्टर, सर्जरीका पाँच, बालरोगका दुई, एनेस्थेसियाका एक, अर्थोपेडिकका तीनजना चिकित्सकका साथै नाककान घाँटीका दुई जना, स्त्रीरोगका दुई जना र दुईजना रेडियोलोजिष्ट छन्।</p>
<p>कोभिड-१९ को उच्च जोखिममा रहेको यस क्षेत्रमा पठाइएका चिकित्सक फर्किने भएपछि यहाँका सरोकारवालाले चिन्ता जनाएका छन्।</p>
प्रतिक्रिया दिनुहोस्
.jpg)
