महामारीका कारण ओलम्पिक सरेपछि आईओसीद्वारा ८० करोड अमेरिकी डलरको कोष स्थापना
<p>काठमाडौं। कोभिड-१९ महामारीका कारण टोकियो ओलम्पिक २०२० एक वर्ष पछाडि सार्नु पर्दा हुन जाने गम्भीर आर्थिक असरलाई न्यूनीकरण गर्नका लागि अन्तर्राष्ट्रिय ओलम्पिक कमिटी (आईओसी)ले ८० करोड अमेरिकी डलरको कोष स्थापना गरेको छ।</p>
<p>महामारीका कारण खेल पछि सरेका कारण आयोजकले ६५ करोड अमेरिकी डलर यो ‘समर’ पछि पाउनेछ भने १५ करोड अन्तर्राष्ट्रिय स्पोर्टस् फेडेरेसन र नेशनल ओलम्पिक कमिटीबाट ऋण छुट्याइनेछ।</p>
<p>‘‘यस्तो परिस्थितिमा सम्झाैता गर्नुपर्छ, सबैले त्याग गर्नुपर्छ’’, आईओसीका अध्यक्ष थोमस बाचले भने, ‘‘हामी खेलाडीको भावना तथा खेलाडी र खेलकुदको गुणस्तरलाई कायम राख्दै लागत घटाउने प्रयास गर्नेछौं।’’</p>
<p>कोभिड-१९ को भ्याक्सिन तथा सर्वसुलभ औषधि पत्ता नलागेसम्म सारिएको मितिमा पनि ओलम्पिक हुन नसक्ने भन्ने कुरालाई अध्यक्ष बाचले अस्वीकार गरे।</p>
<p>प्रतियोगिताको नयाँ मिति २०२१ को २३ जुलाईदेखि ८ अगष्टसम्मका लागि तय गरिएको छ। तथापि ओलम्पिकको नाम भने टोकियो ओलम्पिक २०२० नै हुनेछ।</p>
<p>‘‘हामीसँग एक वर्ष र दुई महीनाको समय बाँकी छ। त्यसैले अहिले कुनै निष्कर्ष निकाल्नु हतारो हुनेछ’’, बाचले भने।</p>
प्रतिक्रिया दिनुहोस्
.jpg)
